നെടുമ്പാശ്ശേരി: അന്താരാഷ്ട്ര വിമാനത്താവളത്തില്‍നിന്ന് റിയാദിലേക്ക് പുറപ്പെടേണ്ട സഊദി എയര്‍ലൈന്‍സ് വിമാനം അനിശ്ചിതമായി വൈകുന്നു. ഇതോടെ സ്ത്രീകളും കുട്ടികളും അടങ്ങുന്ന നിരവധി പേര്‍ വിമാനത്താവളത്തില്‍ കുടുങ്ങി. ഇന്നലെ വൈകിട്ട് 6.40ന് പുറപ്പെടേണ്ട വിമാനമാണ് അനിശ്ചിതമായി വൈകുന്നത്. രാത്രി വൈകിയും ഈ വിമാനം പുറപ്പെട്ടിട്ടില്ല.
വിമാനം വൈകുമെന്ന് മുന്‍കൂട്ടി യാത്രക്കാരെ വിവരം അറിയാക്കാത്തതുമൂലം വിമാനത്താവളത്തില്‍ നേരത്തെ എത്തിയ യാത്രക്കാരാണ് ദുരിതത്തിലായത്. 25 കുട്ടികളും 100 സ്ത്രികളും അടക്കം 300ഓളം യാത്രക്കാരാണ് ഇന്നലെ വൈകിട്ട് 3.30ഓടെ നെടുമ്പാശ്ശേരി വിമാനത്താവളത്തില്‍ എത്തിയത്. പാസ്‌പോര്‍ട്ടും ടിക്കറ്റുമായി അന്താരാഷ്ട്ര ടെര്‍മിനലിനകത്തേക്ക് കടക്കാന്‍ ശ്രമിക്കുന്നതിനിടെ സി.ഐ.എസ്.എഫ് ഉദ്യോഗസ്ഥര്‍ തടഞ്ഞപ്പോഴാണ് സഊദി എയര്‍ലൈന്‍സ് വിമാനം വൈകുമെന്ന് യാത്രക്കാര്‍ അറിയുന്നത്.
മുന്‍കൂട്ടി വിമാനം വൈകുമെന്ന് അറിയാതിരുന്ന യാത്രക്കാരോട് ഇതിന്റെ കാരണം അറിയിക്കാന്‍ വിമാനത്താവളത്തില്‍ സഊദി എയര്‍ലൈന്‍സ് അധികൃതര്‍ ആരും തന്നെ ഇല്ലാതിരുന്നത് പ്രതിഷേധത്തിന് ഇടയാക്കി. സമയമാറ്റം അറിയാതെ ദൂരസ്ഥലങ്ങളില്‍നിന്ന് വരെ എത്തിയ യാത്രക്കാര്‍ക്ക് വിശ്രമസൗകര്യം പോലും ഒരുക്കിയിരുന്നില്ല.