ലണ്ടന്‍: യൂറോപ്യന്‍മാര്‍ക്ക് താടിയെന്നാല്‍ ഭീകരവാദമാണ്. ബ്രിട്ടനില്‍ കഴിഞ്ഞദിവസം താടിപ്പേടിക്ക് ഇരയായത് സിഖുകാരനായ ടാക്‌സി ഡ്രൈവറാണ്. തലപ്പാവുകൂടിയുള്ളത് താലിബാനിയെന്ന വിളിക്കും ഇടവരുത്തി. ടാക്‌സിയില്‍ കയറിയ നാലംഗ സംഘം തന്നെ താലിബാനിയെന്ന് വിളിച്ച് അധിക്ഷേപിക്കുകയും അടിക്കുകയും ചവിട്ടുകയും തലപ്പാവില്‍ പിടിച്ച് ഉന്തുകയും ചെയ്തതായി ഇന്ത്യക്കാരനായ വനീത് സിങ് (41) പറഞ്ഞു. സംഭവത്തില്‍ പൊലിസ് അക്രമികള്‍ക്കായി അന്വേഷണം തുടങ്ങിയിട്ടുണ്ട്. 

ബെര്‍ക്ഷെയറിലെ കാസിനോയില്‍ നിന്ന് ടാക്‌സിയില്‍ കയറിയവര്‍ നീ താലിബാനിയാണോ എന്നു ചോദിച്ച് പരിഹസിക്കുകയും അടിക്കുകയുമായിരുന്നുവെന്ന് വനീത് സിങ് പറഞ്ഞു. 

താനിനി രാത്രിജോലി ചെയ്യില്ലെന്നും അദ്ദേഹം വ്യക്തമാക്കി. സംഗീതാധ്യാപകനായി ജോലിചെയ്യുന്ന അദ്ദേഹം ജോലിക്കു ശേഷമാണ് ടാക്‌സി ഓടിക്കുന്നത്.