സ്വന്തം ലേഖകന്‍

തിരുവനന്തപുരം: കൊവിഡ് കാല അതിജീവനത്തിനായി സംസ്ഥാന സര്‍ക്കാര്‍ പ്രഖ്യാപിച്ച സൗജന്യ ഭക്ഷ്യകിറ്റുകളുടെ വിതരണം നാളെ ആരംഭിക്കും. രാവിലെ 11ന് കോട്ടയം ഏറ്റുമാനൂര്‍ നന്താവനം ഓഡിറ്റോറിയത്തില്‍ നടക്കുന്ന വിതരണോദ്ഘാടനം മുഖ്യമന്ത്രി പിണറായി വിജയന്‍ ഓണ്‍ലൈനായി നിര്‍വഹിക്കും. മന്ത്രി പി. തിലോത്തമന്‍ അധ്യക്ഷനാകും. ആദ്യത്തെ കിറ്റിന്റെ വിതരണം സുരേഷ് കുറുപ്പ് എം.എല്‍.എ നിര്‍വഹിക്കും.

കിറ്റുകള്‍ ഡിസംബര്‍ വരെ നാലു മാസങ്ങളിലാണ് വിതരണം ചെയ്യുക.  മുഴുവന്‍ റേഷന്‍ കാര്‍ഡുടമകള്‍ക്കും കിറ്റുകള്‍ ലഭിക്കും.  ഈ മാസത്തെ കിറ്റ് വിതരണമാണ് നാളെ ആരംഭിക്കുന്നത്. എട്ടിനം സാധനങ്ങളാണ് ഈ മാസത്തെ ഭക്ഷ്യകിറ്റിലുള്ളത്. ഒരോ കിലോഗ്രാം വീതം പഞ്ചസാരയും ഉപ്പും ഗോതമ്പുപൊടിയും, 750 ഗ്രാം വീതം ചെറുപയറും കടലയും, അര ലിറ്റര്‍ വെളിച്ചെണ്ണ, 250 ഗ്രാം സാമ്പാര്‍ പരിപ്പ്, 100 ഗ്രാം മുളകുപൊടി എന്നിവയാണ് ഈ മാസത്തെ കിറ്റില്‍ ഉള്‍പ്പെടുത്തിയത്. 

അതേസമയം മുന്‍ഗണനേതര വിഭാഗക്കാര്‍ക്ക് 15 രൂപ നിരക്കില്‍ അഞ്ചു കിലോ അരി ഈ മാസം നല്‍കുമെന്ന് ഭക്ഷ്യവകുപ്പ് അറിയിച്ചു. ഇവര്‍ക്കുള്ള ഭക്ഷ്യധാന്യം വെട്ടിക്കുറച്ചതിനെതിരെ വ്യാപക പ്രതിഷേധം ഉയര്‍ന്നിരുന്നു. തുടര്‍ന്നാണ് നടപടി.