തിരുവനന്തപുരം: അടുത്ത അധ്യയന വര്‍ഷം മുതല്‍ ചോദ്യ പേപ്പറുകള്‍ ഓണ്‍ലൈനാക്കുന്നതിനുള്ള പരീക്ഷണം നടത്തുമെന്ന് വിദ്യഭ്യാസ മന്ത്രി സി.രവീന്ദ്രനാഥ് പറഞ്ഞു. ഇതിന്റെ ഭാഗമായി പത്താം ക്ലാസിലെയും പ്ലസ് ടുവിലെയും അടുത്ത ഓണപ്പരീക്ഷയുടെയോ ക്രിസ്മസ് പരീക്ഷയുടെയോ ചോദ്യങ്ങള്‍ ഓണ്‍ലൈന്‍ വഴിയാക്കും.
പരീക്ഷാ സമയത്തിന് തൊട്ട് മുന്‍പ് ഓണ്‍ലൈന്‍ വഴി സെന്ററുകളില്‍ ചോദ്യപേപ്പര്‍ എത്തിക്കും. ഇത് വിജയമെന്ന് കണ്ടാല്‍ അവസാന വര്‍ഷ പരീക്ഷയുടെ എല്ലാ ചോദ്യ പേപ്പറുകളും ഓണ്‍ലൈന്‍ വഴിയാക്കും. എല്ലാ പരീക്ഷകളും ഇനി സര്‍ക്കാര്‍ നേരിട്ട് നടത്തും. എല്ലാ വിഷയത്തിനും പാഠപുസ്തകങ്ങളെ ആസ്പദമാക്കി ഇതിനായി ചോദ്യ ബാങ്ക് ഉണ്ടാക്കും. ഇക്കുറി ആര്‍ക്കും മോഡറേഷന്‍ നല്‍കിയിട്ടില്ല. അതേസമയം 85,878 പേര്‍ക്ക് ഗ്രേസ് മാര്‍ക്ക് നല്‍കി.
കഴിഞ്ഞ വര്‍ഷം 76,770 പേര്‍ക്കാണ് ഗ്രേസ് മാര്‍ക്ക് നല്‍കിയതെന്നും ഇക്കുറി ഗ്രേസ് മാര്‍ക്കിനുള്ള കുട്ടികളുടെ എണ്ണത്തില്‍ വര്‍ധനവ് ഉണ്ടായതായും മന്ത്രി പറഞ്ഞു.