മലപ്പുറം: ആന്ധ്രയില്‍ നിന്നും മലപ്പുറത്തേക്കു കടത്തുകയായിരുന്ന  318കിലോ കഞ്ചാവുമായി അഞ്ചംഗസംഘം  പൊലിസ് പിടിയിലായി. അരീക്കോട്  സ്വദേശി ചിറ്റിയന്‍പറമ്പ് ശാഹുല്‍ഹമീദ്(26), മഞ്ചേരി തുറക്കല്‍ പാറട്ടി അക്ബറലി(32), കോട്ടക്കല്‍ ഇന്ത്യന്നൂര്‍ അടട്ടില്‍ വീട്ടില്‍ അബ്ദുറഹിമാന്‍(34), മലപ്പുറം ഇരുമ്പുഴി അമ്പലപ്പറമ്പില്‍ നജീബ്( 34), കൊണ്ടോട്ടി കൊന്നാട് ഇര്‍ഷാദ്(26) എന്നിവരാണ്  പിടിയിലായത്. 

മലപ്പുറം ജില്ലാ പൊലിസ് മേധാവി യു. അബ്ദുല്‍ കരീമിനു ലഭിച്ച രഹസ്യവിവരത്തിന്റെ അടിസ്ഥാനത്തില്‍ കഴിഞ്ഞ ദിവസം പുലര്‍ച്ചെ 3.30ന് മലപ്പുറം ചാപ്പനങ്ങാടി സ്‌കൂളിനു സമീപത്തു നിന്നാണ് പ്രതികള്‍ പിടിയിലായത്. ഉള്ളികയറ്റിവന്ന  മിനിലോറിയിലും ഇന്നോവ കാറിലുമായി എട്ടു ചാക്കുകളിലായാണ്   ഇവര്‍ കഞ്ചാവ് കടത്തിയിരുന്നത്. ഓരോചാക്കിലും  25 കിലോ വീതം  കഞ്ചാവാണ് ഉണ്ടായിരുന്നത്.  സംഭവത്തിലെ മൂന്നു പ്രതികള്‍ ഓടിരക്ഷപ്പെട്ടു. ഇവരെ തിരിച്ചറിയാനായിട്ടുണ്ടെന്നു പൊലിസ് പറഞ്ഞു. 

കഞ്ചാവു കടത്തിയ ലോറിയും അതിനു അകമ്പടിയായി പ്രതികള്‍ സഞ്ചരിച്ച  ഇന്നോവ കാറും പിടിച്ചെടുത്തിട്ടുണ്ട്. ഏഴുചാക്കുകള്‍ ലോറിയിലും ഒരു ചാക്ക് ഇന്നോവയിലുമായിട്ടായിരുന്നു ഉണ്ടായിരുന്നത്. 

കഞ്ചാവ് മലപ്പുറം കൊണ്ടോട്ടിയിലേക്കു കൊണ്ടുപോവാനായിരുന്നു പ്രതികള്‍ ലക്ഷ്യമിട്ടിരുന്നത്. എന്നാല്‍ ആര്‍ക്കാണ്  ഇതു വിതരണം ചെയ്യുന്നത് എന്നതു സംബന്ധിച്ച് അന്വേഷണം നടന്നുവരികയാണ്. പ്രതിളെ ഇന്നലെ മഞ്ചേരി കോടതിയില്‍ ഹാജരാക്കി. മലപ്പുറം ഡിവൈ.എസ്.പി പി.ഹരിദാസ്, സി.ഐ  എ. പ്രേംജിത്ത്, എസ്.ഐ സംഗീത്പുനത്തില്‍, അഡീഷണല്‍ എസ്.ഐ മുഹമ്മദ്, സി.പി.ഒമാരായ ജാഷിന്‍ഹംദ്, പ്രശോഭ് എന്നിവരാണ് പ്രതികളെ പിടികൂടിയ സംഘത്തിലുണ്ടായിരുന്നത്.