തിരുവനന്തപുരം: നിയമസഭയില്‍ അന്‍പതു വര്‍ഷം പൂര്‍ത്തിയാക്കിയ മുന്‍ മുഖ്യമന്ത്രി ഉമ്മന്‍ ചാണ്ടിക്ക് യു.ഡി.എഫിന്റെ സ്‌നേഹാദരം. ഇന്ദിരാഭവനില്‍ സംഘടിപ്പിച്ച ആദരിക്കല്‍ ചടങ്ങ് പ്രതിപക്ഷനേതാവ് രമേശ് ചെന്നിത്തല ഉദ്ഘാടനം ചെയ്തു. യു.ഡി.എഫ് കണ്‍വീനര്‍ ബെന്നി ബെഹനാന്‍ അധ്യക്ഷനായി.
മലയാളിയുടെ മനസില്‍ പതിഞ്ഞുകിടക്കുന്ന പേരാണ് ഉമ്മന്‍ ചാണ്ടിയെന്ന് ബെന്നി ബെഹന്നാന്‍ പറഞ്ഞു. വികസന രാഷ്ട്രീയത്തിന് ദിശാബോധം നല്‍കിയയാളാണ് ഉമ്മന്‍ചാണ്ടിയെന്ന് കെ.പി.സി.സി അധ്യക്ഷന്‍ മുല്ലപ്പള്ളി രാമചന്ദ്രന്‍ പറഞ്ഞു.
പാവപ്പട്ടവരെ സഹായിക്കുന്നതില്‍ ഉമ്മന്‍ചാണ്ടി എന്നും ശ്രദ്ധാലുവായിരുന്നെന്ന് മുസ്്‌ലിം ലീഗ് സംസ്ഥാന സെക്രട്ടറി ബീമാപള്ളി റഷീദ് പറഞ്ഞു. അസാധ്യകാര്യങ്ങളെ സാധ്യമാക്കുന്ന നേതാവാണ് ഉമ്മന്‍ചാണ്ടിയെന്ന് എം.എം ഹസന്‍ പറഞ്ഞു. രാഷ്ട്രീയത്തെ തന്റെ വഴിയില്‍ നടത്താന്‍ സാധിച്ച അപൂര്‍വം നേതാക്കളിലൊരാളാണ് ഉമ്മന്‍ചാണ്ടിയെന്ന് സി.എം.പി നേതാവ് സി.പി ജോണ്‍ പറഞ്ഞു.
ആര്‍.എസ്.പി നേതാവ് ഷിബു ബേബി ജോണ്‍, കേരള കോണ്‍ഗ്രസ് ജേക്കബ് ചെയര്‍മാന്‍ അനൂപ് ജേക്കബ് എം.എല്‍.എ, ഫോര്‍വേഡ് ബ്ലോക്ക് ദേശീയ സെക്രട്ടറി ജി. ദേവരാജന്‍, മോന്‍സ് ജോസഫ്, യു.ഡി.എഫ് ജില്ലാ ചെയര്‍മാന്‍ സോളമന്‍ അലക്‌സ് എന്നിവര്‍ പങ്കെടുത്തു.