കുന്നംകുളം: കാട്ടകാമ്പാലില്‍ സംഘര്‍ഷം. ഡി.വൈ.എഫ്.ഐ പ്രവര്‍ത്തകര്‍ക്ക് വെട്ടേറ്റു. ബി.ജെ.പി പ്രവര്‍ത്തകന് പരിക്ക്്. ഡി.വൈ.എഫ്.ഐ പ്രവര്‍ത്തകരായ കാട്ടകാമ്പാല്‍ നടുമുറി ഞാലില്‍ പ്രവീണ്‍ (21) പൂന്തോട്ടത്തില്‍ സുജിത്ത് (23), ബി.ജെ.പി പ്രവര്‍ത്തകന്‍ വെളിയത്ത് വീട്ടില്‍ വിവേക്(21) എന്നിവര്‍ക്കാണ് പരിക്ക്. ഇവരെ കുന്നംകുളത്തെ വിവിധ ആശുപത്രികളില്‍ പ്രവേശിപ്പിച്ചു. ഇതില്‍ പ്രവീണിന്റെ പരിക്ക് ഗുരുതരമാണ്. വൈകീട്ട് 7 ഓടെ കാട്ടകാമ്പാല്‍ പള്ളിക്ക് സമീപമായിരുന്നു സംഘര്‍ഷമുണ്ടായത്. ക്ഷേത്രോത്സവം കഴിഞ്ഞു മടങ്ങുകയായിരുന്ന ഡി.വൈ.എഫ്.ഐ പ്രവര്‍ത്തകരെ സംഘം ചേര്‍ന്ന് ആക്രമിച്ചുവെന്നാണ് പരാതി. മേഖലയില്‍ കഴിഞ്ഞ ചില ദിവസങ്ങളായി നേരിയ
സംഘര്‍ഷം നില നിന്നിരുന്നു. ഇത് സംബന്ധിച്ച് രണ്ട പരാതികള്‍ പൊലിസിന് നല്‍കിയിരുന്നതായി സി.പി.എം പ്രവര്‍ത്തകര്‍ പറഞ്ഞു. സംഘര്‍ഷ സാധ്യത കണക്കിലെടുത്ത് സ്ഥലത്ത് പൊലിസ് നിരീക്ഷണം ഏര്‍പെടുത്തി. സംഘര്‍ഷം സംബന്ധിച്ച് പൊലിസ് കേസെടുത്തു.