മലപ്പുറം: പാണക്കാട് സയ്യിദ് മുഹമ്മദലി ശിഹാബ് തങ്ങളുടെ എട്ടാം ഉറൂസ് മുബാറക് ഭക്തിസാന്ദ്രമായി. ആയിരക്കണക്കിനു വിശ്വാസികളാണ് ഇന്നലെ രാവിലെ മുതല്‍ മഖാമില്‍ തങ്ങളുടെ ഓര്‍മയില്‍ ഒത്തുചേര്‍ന്നത്. സയ്യിദ് ഹൈദരലി ശിഹാബ് തങ്ങളുടെ നേതൃത്വത്തില്‍ കൂട്ടസിയാറത്തോടെ ഉറൂസിനു തുടക്കമായി. ആത്മീയ സദസ് ഹൈദരലി തങ്ങള്‍ ഉദ്ഘാടനം ചെയ്തു.
സമുദായത്തിന് വേണ്ടി എപ്പോഴും തുറന്ന് വച്ച കവാടമായിരുന്നു ശിഹാബ് തങ്ങളെന്നും അദ്ദേഹത്തെ സമൂഹം സ്മരിക്കുന്നത് ജീവകാരുണ്യ പ്രവര്‍ത്തനത്തിലൂടെയും മറ്റു സുകൃതങ്ങളിലൂടെയുമാണെന്നും തങ്ങള്‍ സ്മരിച്ചു. സമൂഹത്തിനിടയില്‍ ഐക്യം നിലനിര്‍ത്താനും മത സൗഹാര്‍ദത്തിന്റെ പ്രതീകമായി നിലകൊള്ളാനും ശ്രമിച്ച അദ്ദേഹത്തെ മാതൃകയാക്കണമെന്നു തങ്ങള്‍ ഉദ്‌ബോധിപ്പിച്ചു.
എട്ടാം ആണ്ടുദിനത്തില്‍ എസ്.വൈ.എസ് മലപ്പുറം ജില്ലാ കമ്മിറ്റിയുടെ ആഭിമുഖ്യത്തിലായിരുന്നു ചടങ്ങ്.
പാണക്കാട് ജുമുഅത്ത് പള്ളിയിലെ ഉറൂസ് മുബാറകില്‍ ഖത്മുല്‍ ഖുര്‍ആന്‍ സദസ്, മൗലിദ് പാരായണം, അനുസ്മരണ സംഗമം, അന്നദാനം നടന്നു. അനുസ്മരണ സദസ് സയ്യിദ് ബശീറലി ശിഹാബ് തങ്ങള്‍ ഉദ്ഘാടനം ചെയ്തു. സയ്യിദ് കെ.കെ.എസ് തങ്ങള്‍ വെട്ടിച്ചിറ അധ്യക്ഷനായി. സമസ്ത കേരള ജംഇയ്യത്തുല്‍ ഉലമാ ജനറല്‍ സെക്രട്ടറി പ്രൊഫ. കെ. ആലിക്കുട്ടി മുസ്‌ലിയാര്‍ അനുഗ്രഹ പ്രഭാഷണം നടത്തി.
എസ്.വൈ.എസ് സംസ്ഥാന ജനറല്‍ സെക്രട്ടറി സയ്യിദ് മുഹമ്മദ് കോയ തങ്ങള്‍ ജമലുല്ലൈലി മൗലിദ് മജ്‌ലിസിനു നേതൃത്വം നല്‍കി. ആനമങ്ങാട് മുഹമ്മദ് കുട്ടി ഫൈസി അനുസ്മരണ പ്രഭാഷണം നടത്തി. മികച്ച മുദര്‍രിസിനുള്ള ശിഹാബ് തങ്ങള്‍ അവാര്‍ഡ് വാക്കോട് മൊയ്തീന്‍ കുട്ടി ഫൈസിക്ക് ഹൈദരലി ശിഹാബ് തങ്ങള്‍ സമ്മാനിച്ചു. സയ്യിദ് മാനു തങ്ങള്‍ വെള്ളൂര്‍ സമാപന പ്രാര്‍ഥന നടത്തി.
സമസ്ത കേരളാ ഇസ്‌ലാം മത വിദ്യാഭ്യാസ ബോര്‍ഡ് ജനറല്‍ സെക്രട്ടറി എം.ടി അബ്ദുല്ല മുസ്‌ലിയാര്‍, പി.കെ കുഞ്ഞാലിക്കുട്ടി, കെ. പി. എ മജീദ്,സയ്യിദ് ബി.എസ്.കെ തങ്ങള്‍, സയ്യിദ് മുത്തുപ്പ തങ്ങള്‍, സയ്യിദ് ഹാശിറലി ശിഹാബ് തങ്ങള്‍, സയ്യിദ് ശമീറലി ശിഹാബ് തങ്ങള്‍, സയ്യിദ് ബാപ്പു തങ്ങള്‍, സയ്യിദ് കെ.കെ.എസ് ബാപ്പുട്ടി തങ്ങള്‍, ഹാജി കെ. മമ്മദ് ഫൈസി, പുത്തനഴി മൊയ്തീന്‍ ഫൈസി, കാടാമ്പുഴ മൂസ ഹാജി, യു.ശാഫി ഹാജി, സി.എച്ച് ത്വയ്യിബ് ഫൈസി, സി.അബ്ദുല്ല മൗലവി, അബ്ദുല്‍ ഖാദിര്‍ ഫൈസി കുന്നുംപുറം, സലീം എടക്കര, ചേലേമ്പ്ര അബ്ദുല്‍ ഖാദിര്‍ ഹാജി, പാതിരമണ്ണ അബ്ദുറഹ്മാന്‍ ഫൈസി, മുടിക്കോട് മുഹമ്മദ് മുസ്‌ലിയാര്‍, ഹംസ റഹ്മാനി കൊണ്ടിപറമ്പ്, കെ.ടി ഹുസൈന്‍ കുട്ടി മൗലവി പുളിയാട്ടുകുളം, കെ.പി അശ്‌റഫ് ഫൈസി സംബന്ധിച്ചു.