കൊയിലാണ്ടി: മാറുന്ന കാലഘട്ടത്തിനനുസരിച്ച് വിദ്യാഭ്യാസ രീതിയില്‍ മാറ്റം വരേണ്ടതുണ്ടെന്നും അതിന് പൊതുവിദ്യാഭ്യാസത്തെ ശക്തിപ്പെടുത്തുകയാണ് വേണ്ടതെന്നും സ്പീക്കര്‍ പി. ശ്രീരാമകൃഷ്ണന്‍.
കൊയിലാണ്ടി കൂട്ടം ഗ്ലോബല്‍ കമ്മ്യൂണിറ്റിയുടെ 'കുഞ്ഞുമനസുകള്‍ക്ക് ഒരു കുട്ടിസമ്മാനം' എന്ന പദ്ധതി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. താലൂക്കിലെ പൊതുവിദ്യാലയങ്ങളിലെ തിരഞ്ഞെടുത്ത 1500 വിദ്യാര്‍ഥികള്‍ക്ക് ബാഗ്, കുട, പുസ്തകങ്ങള്‍ എന്നിവയടങ്ങിയ സമ്പൂര്‍ണ സ്‌കൂള്‍ കിറ്റ് ചടങ്ങില്‍ വിതരണം ചെയ്തു.
കൊയിലാണ്ടി കൂട്ടം ഗ്ലോബല്‍ ചെയര്‍മാന്‍ ശിഹാബുദ്ദീന്‍ എസ്.പി.എച്ച് അധ്യക്ഷനായി. കെ. ദാസന്‍ എം.എല്‍.എ, നഗരസഭാ ചെയര്‍മാന്‍ കെ. സത്യന്‍, അഡ്വ. പി.എസ് ശ്രീധരന്‍പിള്ള, സുരേന്ദ്രന്‍, സത്യനാഥന്‍ മാടഞ്ചേരി, റഷീദ്, മുത്തുക്കോയ തങ്ങള്‍, ഷാജു ചന്ദ്രോദയം, അമ്പാടി ബാലന്‍, വി.വി സുധാകരന്‍, അഹമ്മദ് മൂടാടി, എ. അസീസ്, ടി. അനില്‍കുമാര്‍ സംസാരിച്ചു. കൂട്ടം പേഴ്‌സണ്‍ ഓഫ് ദി ഇയര്‍ പുരസ്‌കാരം ഷഹീര്‍ ഗാലക്‌സിക്ക് സ്പീക്കര്‍ സമ്മാനിച്ചു.