മണ്ണാര്‍ക്കാട്: അട്ടപ്പാടിയില്‍ 6.5 കിലോ കഞ്ചാവുമായി രണ്ട് യുവാക്കളെ പൊലീസ് അറസ്റ്റ് ചെയ്തു. കുന്നംകുളം പെരുമ്പിലാവ് സ്വദേശികളായ ലിഷോയ് (21), ബാദുഷ (18) എന്നിവരെയാണ് അഗളി പൊലീസ് പിടികൂടിയത്. തമിഴ് നാട്ടില്‍നിന്നും തൃശൂര്‍ ജില്ലയിലെ വിവിധ സ്ഥലങ്ങളിലേക്ക് വില്‍പ്പനക്ക് വേണ്ടി കടത്തിക്കൊണ്ടു പോവുകയായിരുന്നു. അഗളി എ.എസ്.പി സുജിത് ദാസ് ഐ.പി.എസിന് ലഭിച്ച രഹസ്യവിവരത്തെ തുടര്‍ന്ന് നടത്തിയ അന്വേഷണത്തില്‍ ചൊവ്വാഴ്ച വൈകുന്നേരം ആറരയോടെയാണ് പ്രതികളെ പിടികൂടിയത്. ലിഷോയ് മുമ്പ് അഞ്ചോളം വാഹനങ്ങള്‍ മോഷണം നടത്തിയ കേസുകളില്‍ ശിക്ഷ കഴിഞ്ഞ് അഞ്ച് മാസം മുന്‍പാണ് പുറത്തിറങ്ങിയതെന്നും, ബാംഗ്ലൂരില്‍ പഠിക്കുന്ന ബാദുഷ അവധി കഴിഞ്ഞ് ബാഗ്ലൂരിലേക്ക് മടങ്ങുമ്പോള്‍ കഞ്ചാവ് കടത്താറുണ്ടെന്നും അന്വേഷണത്തില്‍ വ്യക്തമായതായി പൊലീസ് പറഞ്ഞു. അഗളി എ.എസ്.പി സുജിത് ദാസ് ഐ.പി.എസും, സ്‌ക്വാഡും, അഗളി എസ്.ഐ സുബിന്‍, എ.എസ്.ഐ രാജീവ്, സി.പി.ഒമാരായ അനൂപ്, ഷിജു ഫ്രാന്‍സീസ്, ഹാരിസ് എന്നിവരടങ്ങുന്ന സംഘമാണ് പ്രതികളെ പിടികൂടുന്നതിന് നേതൃത്വം നല്‍കിയത്.