തിരൂര്‍: ജനതാബസാര്‍ സീക്കോ ആര്‍ട്‌സ് ആന്റ് സ്‌പോര്‍ട്‌സ് ക്ലബിന്റെ 25-ാം വാര്‍ഷികാഘോഷത്തിന്റെ സമാപനത്തോടനുബന്ധിച്ച് ' മെഹര്‍ജാന്‍' എന്ന പേരില്‍ സംഘടിപ്പിക്കുന്ന വാരാഘോഷ പരിപാടികള്‍ക്ക് ഇന്ന് തുടക്കമാകും. വൈകിട്ട് നാലിന് സാഹിത്യകാരന്‍ കെ.പി രാമനുണ്ണി ഉദ്ഘാടനം ചെയ്യും. ക്ലബിന്റെ ലോഗോ പ്രകാശനം വി.അബ്ദുറഹ്മാന്‍ എം.എല്‍.എ നിര്‍വഹിക്കും. വിവിധ മേഖലകളില്‍ വ്യക്തിമുദ്ര പതിപ്പിച്ച ജനതാബസാര്‍ സ്വദേശികളെ അഡ്വ: എന്‍.ഷംസുദ്ദീന്‍ എം.എല്‍.എ ആദരിക്കും. തുടര്‍ന്ന് വൈകീട്ട് ഏഴിന് സിറാജ് അമന്‍ നയിക്കുന്ന മെഹ്ഫില്‍ ഗസല്‍ സന്ധ്യ അരങ്ങേറും. തിങ്കളാഴ്ച വൈകീട്ട് ഏഴിന് ലോക്കല്‍ വോളിബോള്‍ ടൂര്‍ണമെന്റ്,  ചൊവ്വാഴ്ച വൈകീട്ട് ഏഴിന് സീക്കോ കരോക്കെ നൈറ്റ്, ബുധനാഴ്ച വൈകീട്ട് ഏഴിന് നാടന്‍ കായികമത്സരങ്ങള്‍, വ്യാഴാഴ്ച വൈകീട്ട് ആറു മുതല്‍ നാട്ടുകാരുടെ വിവിധ കലാപരിപാടികള്‍ എന്നിവയും നടക്കും.  വെള്ളിയാഴ്ച വൈകീട്ട് നാലിന് സാമൂഹ്യ ബോധവല്‍ക്കരണ ക്ലാസ് , രാത്രി എട്ടിന് ഡി.ജെ നൈറ്റ് എന്നിവ നടക്കും. 14ന് തിരൂര്‍ ടൗണ്‍ഹാളില്‍ നടക്കുന്ന മെഗാ നൈറ്റോടെ 25-ാം വാര്‍ഷികാഘോഷ പരിപാടികള്‍ക്ക് സമാപനമാകുമെന്ന് സ്വാഗതസംഘം കണ്‍വീനര്‍ ഫൈസല്‍ കാടേങ്ങല്‍, സീക്കോ ക്ലബ് പ്രസിഡന്റ് കെ.എം മുഹമ്മദ് കാസിം, ഭാരവാഹികളായ തന്‍വീര്‍ കാടേങ്ങല്‍, എ. നൗഷാദ്, ജാസിം, ഷന്‍വി വാര്‍ത്താസമ്മേളനത്തില്‍ പറഞ്ഞു.