റിയാദ് :ബാബരി മസ്ജിദ് തകർത്ത കേസിലെ പ്രത്യേക സിബിഐ കോടതി വിധി അത്യന്തം നിരാശാജനകവും നീതിന്യായ വ്യവസ്ഥക്കേറ്റ കനത്ത പ്രഹരവും ഒപ്പം ജുഡീഷ്യറി സംഘപരിവാരത്തിൻ്റെ ചട്ടുകമായി മാറിയെന്നതിന്റെ തെളിവുമാണെന്ന് ഇന്ത്യൻ സോഷ്യൽ ഫോറം റിയാദ് ഘടകം.അന്താരാഷ്ട്ര മാധ്യമ പ്രവർത്തകരുൾപ്പെടെ നിരവധി മാധ്യമ പ്രവർത്തകർ സാക്ഷികളായി തകർക്കപ്പെട്ട ബാബരി മസ്ജിദ് 28 വർഷങ്ങൾ കഴിയുമ്പോൾ പള്ളി പൊളിച്ചവരോ തെളിവോ ഇല്ലെന്ന കോടതിയുടെ കണ്ടെത്തൽ ജുഡീഷ്യറി പൂർണ്ണമായും ആർ എസ് എസ്സിന് കീഴൊതുങ്ങിയെന്നതിന്റെ തെളിവാണ്. കോൺഗ്രസ് ഗവർമെന്റ് നിയമിച്ച ജസ്റ്റിസ് ലിബർഹാൻ കമ്മീഷൻ കൃത്യമായ അന്വേഷണത്തിലൂടെ കണ്ടെത്തിയ ഗൂഡാലോചന കുറ്റവും മുഖ്യപ്രതികളേയും നിയമത്തിന്റെ മുന്നിൽ കൊണ്ട് വരാനോ കമ്മീഷൻ റിപ്പോർട്ട് നടപ്പിൽ വരുത്താനോ വിമുഖത കാട്ടിയ കോൺഗ്രസ് അടക്കമുള്ള മുഖ്യധാരാ രാഷ്ട്രീയ പാർട്ടികളുടെ നിസ്സംഗതയാണ് പ്രതികൾ രക്ഷപ്പെടാൻ വഴിയൊരുക്കിയത്.

     മാസങ്ങൾക്ക് മുമ്പ് തന്നെ പള്ളി പൊളിക്കുന്ന ദിവസം പ്രഖ്യാപിച്ച് രക്തരൂക്ഷിത കലാപങ്ങൾ സൃഷ്ടിച്ച് ഗൂഡാലോചന നടത്തി രാജ്യത്തെ എല്ലാ സംവിധാനങ്ങളേയും നോക്കുകുത്തിയാക്കി പരസ്യമായി പളളി തകർത്തവർക്കെതിരെ തെളിവില്ലായെന്ന വാദം ലോകരാജ്യങ്ങൾക്കിടയിൽ ഇന്ത്യൻ ജുഡീഷ്യറിയേ നാണം കെടുത്തുന്നതാണ്. നീതി നടപ്പിൽ വരുത്തേണ്ട ജുഡീഷ്യറിയും നിയമപാലകരും സംഘപരിവാര അജണ്ട നടപ്പിൽ വരുത്താൻ നീതിന്യായ വ്യവസ്ഥയെ അട്ടിമറിക്കുകയാണ്.പൊതുജനത്തിന് നിയമ വ്യവസ്ഥയിലുള്ള വിശ്വാസം നഷ്ടപ്പെട്ടാൽ ഗുരുതരമായ പ്രത്യാഘാതം രാജ്യത്ത് സംജാതമാകുമെന്നും ഇന്ത്യൻ സോഷ്യൽ ഫോറം റിയാദ് ഘടകം കുറ്റപ്പെടുത്തി.