കാസര്‍കോട്: കാസര്‍കോട് പാര്‍ലമെന്റ് മണ്ഡലത്തില്‍ തൃക്കരിപ്പൂര്‍ അസംബ്ലി മണ്ഡലത്തിലെ കൂളിയാട് സ്‌കൂളില്‍ നടന്ന റീപോളിങില്‍ 84.13 ശതമാനം വോട്ടു രേഖപ്പെടുത്തി. 599 സ്ത്രീ വോട്ടര്‍മാരും, 462 പുരുഷ വോട്ടര്‍മാരുമാണ് ഞായറാഴ്ച രാവിലെ മുതല്‍ വൈകുന്നേരം 7 വരെ നടന്ന വോട്ടെടുപ്പില്‍ തങ്ങളുടെ സമ്മതിദാനാവകാശം രേഖപ്പെടുത്തിയത്.

കള്ളവോട്ട് ചെയ്തുവെന്ന് കണ്ടെത്തിയതിനെ തുടര്‍ന്നാണ് പാര്‍ലമെന്റ് മണ്ഡലത്തിലെ പയ്യന്നൂര്‍, കല്യാശേരി മണ്ഡലത്തിലെ ചില ബൂത്തുകളില്‍ ഉള്‍പ്പെടെ റീപോളിങ് നടന്നത്. കൂളിയാട് സ്‌കൂള്‍ ബൂത്തില്‍ കള്ളവോട്ട് ചെയ്ത ശ്യാംകുമാര്‍ എന്നയാള്‍ക്കെതിരെ തെളിവിന്റെ അടിസ്ഥാനത്തില്‍ കേസെടുത്തിരുന്നു.

ഏപ്രില്‍ 23 ന് നടന്ന വോട്ടെടുപ്പില്‍ പോളിങ് ശതമാനം 88.9 ആയിരുന്നു. മുന്‍ വോട്ടെടുപ്പില്‍ പോള്‍ ചെയ്ത വോട്ടിനേക്കാള്‍ 68 വോട്ടാണ് റീപോളിങില്‍ കുറഞ്ഞത്.

അതിരാവിലെ തന്നെ സ്ത്രീ വോട്ടര്‍മാരുടെ നീണ്ട ക്യൂവാണ് ബൂത്തിന് മുന്നില്‍ പ്രത്യക്ഷപ്പെട്ടത്. വോട്ടു രേഖപ്പെടുത്താനുള്ള സമയം കഴിഞ്ഞതിനെ തുടര്‍ന്ന് വരിയില്‍ ഉണ്ടായ വോട്ടര്‍മാര്‍ക്ക് ടോക്കണ്‍ നല്‍കിയാണ് വൈകുന്നേരം ഏഴോടെ വോട്ടെടുപ്പ് പൂര്‍ത്തിയാക്കിയത്.