നിലമ്പൂര്‍: ഒരുകാലത്തു കര്‍ഷകരുടെ വിയര്‍പ്പില്‍ പൊന്നുവിളയിച്ചിരുന്ന മലയോര ഗ്രാമങ്ങള്‍ കുടിയിറക്കു ഭീഷണിയില്‍. മേഖലയിലെ നൂറുകണക്കിനു കര്‍ഷകര്‍ കൃഷിയിടങ്ങള്‍ വിറ്റു മറ്റു പ്രദേശങ്ങളിലേക്കു ചേക്കേറിക്കഴിഞ്ഞു.
മലയോര കര്‍ഷകരുടെ പ്രശ്‌നങ്ങള്‍ പഠിച്ചു പരിഹാരം കാണുന്നതില്‍ വന്ന നിംസംഗതയാണ് മണ്ണ് ഉപേക്ഷിക്കാന്‍ കര്‍ഷകരെ പ്രേരിപ്പിച്ചത്. കഴിഞ്ഞ അഞ്ചു വര്‍ഷമായി വ്യാപക കൊഴിഞ്ഞുപോക്കാണ് ഈ മേഖലയില്‍ ഉണ്ടായിരിക്കുന്നത്. കോഴിക്കോട്, മലപ്പുറം ജില്ലകളിലെ കുടിയേറ്റ ഗ്രാമങ്ങളായ കക്കാടംപൊയില്‍, താഴെ കക്കാട്, അകമ്പുഴ കരിമ്പ്, മലപ്പുറം ജില്ലയിലെ ഊര്‍ങ്ങാട്ടിരി, ചാലിയാര്‍ പഞ്ചായത്തുകളിലെ വെണ്ടേക്കുംപൊയില്‍, ചീങ്കണ്ണിപ്പാലി, പലകതോട്, വാളാംതോട്, തോട്ടപ്പള്ളി, നായാടംപൊയില്‍, 12,11,10,8 ബ്ലോക്കുകള്‍, അളക്കല്‍, വിജയപുരം മേഖലകളിലാണ് കുടിയിറക്കം രൂക്ഷമായത്. കാര്‍ഷിക വിളകളുടെ വിലയിടിവ്, വിളകളുടെ രോഗബാധ എന്നിവയാണ് കര്‍ഷകരെ കുടിയിറക്കാന്‍ പ്രേരിപ്പിച്ചത്. 1970കളുടെ തുടക്കത്തില്‍ കുടിയേറിയ ഈ ഗ്രാമങ്ങളിലെ പ്രധാന കാര്‍ഷിക വിളകള്‍, കാപ്പി, കുരുമുളക്, കമുക്, തെങ്ങ് എന്നിവയാണ്. ഇവയില്‍ രോഗബാധ വ്യാപകമായതോടെ കൃഷികള്‍ കൂട്ടമായി നശിച്ചു. ബാങ്കുകളില്‍നിന്നു കടമെടുത്ത് കൃഷി നടത്തിയവര്‍ ജപ്തി ഭീഷണിയിലുമാണ്.ഈ പ്രദേശങ്ങളില്‍ 1,500ലേറെ കര്‍ഷക കുടുംബങ്ങളുണ്ടായിരുന്നത് ഇപ്പോള്‍ അത് അറുനൂറിനു താഴെയായി ചുരുങ്ങി.