തിരുവനന്തപുരം: പ്ലസ് വണ്‍ ഏകജാലക പ്രവേശനത്തിനുള്ള അപേക്ഷ ഇന്ന് വൈകിട്ട് നാലുമണിമുതല്‍ ഓണ്‍ലൈനായി സമര്‍പ്പിക്കാം. www.hscap.kerala.gov.in എന്ന സൈറ്റിലൂടെ മെയ് 22 വരെ അപേക്ഷ സമര്‍പ്പിക്കാം. മെയ് 22ന് ട്രയല്‍ അലോട്ട് മെന്റും ജൂണ്‍ അഞ്ചിന് ആദ്യ അലോട്ട് മെന്റും പ്രസിദ്ധീകരിക്കും. ജൂണ്‍ പതിനാലിന് ആദ്യ രണ്ട് അലോട്ട്‌മെന്‍ുകള്‍ പൂര്‍ത്തിയാക്കി പ്ലസ് വണ്‍ ക്ലാസുകള്‍ ആരംഭിക്കും.

ആദ്യ രണ്ട് അലോട്ടുമെന്റുകള്‍ക്ക് ശേഷം പുതിയ അപേക്ഷ ക്ഷണിച്ച് സപ്ലിമെന്ററി അലോട്ട്‌മെന്റിലൂടെ ഒഴിവുള്ള സീറ്റുകള്‍ നികത്തും. ജൂലൈ 22ഓടെ പ്ലസ് വണ്‍ പ്രവേശന നടപടികള്‍ അവസാനിപ്പിക്കും. സര്‍ക്കാര്‍, എയ്ഡഡ് സ്‌കൂളുകളിലായി 2,94,948 സീറ്റുകളാണ് സംസ്ഥാനത്തുള്ളത്. എയ്ഡഡ് സ്‌കൂളുകളിലെ മാനേജ്‌മെന്റ് ക്വോട്ടയില്‍ 46,632 സീറ്റുകളും കമ്യൂണിറ്റി ക്വോട്ടയില്‍ 25,500 സീറ്റുകളും ഉണ്ട്. അണ്‍ എയ്ഡഡ് സ്‌കൂളുകളിലെ 55,830 സീറ്റുകള്‍ കൂടെ ചേര്‍ത്ത് ഇത്തവണ 4,22,910 സീറ്റുകളാണ് മൊത്തം പ്രവേശനത്തിനായുള്ളത്.

ആകെ 2,94948 സീറ്റുകളില്‍ 1,44,504 സീറ്റുകള്‍ സയന്‍സ് ഗ്രൂപ്പിലും 63,000 സീറ്റുകള്‍ ഹ്യുമാനിറ്റീസ് ഗ്രൂപ്പിലും 87,444 സീറ്റുകള്‍ കൊമേഴ്‌സ് ഗ്രൂപ്പിലുമുണ്ട് സര്‍ക്കാര്‍ സ്‌കൂളുകളില്‍ മാത്ം 76,800 സയന്‍സ് സീറ്റുകളും 40,500 ഹ്യുമാനിറ്റീസ് സീറ്റുകളും 51,840 കൊമേഴ്‌സ് സീറ്റുകളുമുണ്ട്. എയ്ഡഡ് സ്‌കൂളുകളില്‍ 1,06,560 സയന്‍സ് സീറ്റുകളും 35,340 ഹ്യുമാനിറ്റീസ് സീറ്റുകളും 56,040 കൊമേഴ്‌സ് സീറ്റുകളുമുണ്ട്. സ്‌പോര്‍ട്‌സ് ക്വാട്ട പ്രവേശനം രണ്ടുഘട്ടമായി നടത്തും. അപേക്ഷകരെ സഹായിക്കാനായി 75 താലൂക്ക് കേന്ദ്രങ്ങളില്‍ തിങ്കളാഴ്ച മുതല്‍ മെയ്19 വരെ ഫോക്കസ് പോയിന്റുകള്‍ പ്രവര്‍ത്തിക്കും