അശ്‌റഫ് കൊണ്ടോട്ടി

കൊണ്ടോട്ടി: തദ്ദേശ സ്വയംഭരണ സ്ഥാപനങ്ങളിലെ സംവരണ വാര്‍ഡുകള്‍ തീരുമാനമായതിനു പിന്നാലെ അധ്യക്ഷ സ്ഥാനത്തേക്കുള്ള സംവരണ നറുക്കെടുപ്പ് ഈ മാസം നടക്കും. ആകെയുള്ള 1,200 തദ്ദേശ സ്ഥാപനങ്ങളില്‍ 602 ഇടങ്ങളിലും വനിതകള്‍ക്കായിരിക്കും അധ്യക്ഷ പദവി ലഭിക്കുക. ശേഷിക്കുന്ന 598 ഇടങ്ങളില്‍ ജനറല്‍ സംവരണമാകും.

602 തദ്ദേശ സ്ഥാപനങ്ങളില്‍ 535 ഇടങ്ങളില്‍ ജനറല്‍ വനികളാകും അധ്യക്ഷസ്ഥാനത്തുണ്ടാവുക. 57 ഇടങ്ങളില്‍ പട്ടികജാതി സ്ത്രീകളും 10 ഇടങ്ങളില്‍ പട്ടികവര്‍ഗ സ്ത്രീകളും ഉള്‍പ്പെടെ 602 പേരും വനികളാവും അധ്യക്ഷന്മാര്‍. ശേഷിക്കുന്ന ജനറല്‍ വിഭാഗത്തില്‍ 57 പട്ടികജാതിക്കാരും 10 പട്ടികവര്‍ഗക്കാരും ഉള്‍പ്പെടെ 598 പേര്‍ പ്രസിഡന്റുമാരാകും. സംസ്ഥാനത്തെ ആറ് കോര്‍പറേഷനുകളില്‍ കോഴിക്കോട്, കൊല്ലം, തിരുവനന്തപുരം എന്നിവടങ്ങളില്‍ വനിതകളാകും മേയര്‍ സ്ഥാനത്തുണ്ടാവുക. കണ്ണൂര്‍, തൃശൂര്‍, കൊച്ചി എന്നിവടങ്ങളില്‍ പുരുഷന്മാരും മേയര്‍മാരാകും.941 ഗ്രാമപഞ്ചായത്തുകളില്‍ 471 പേരാണ് വനിതാ അധ്യക്ഷന്മാരുണ്ടാവുക. ഇവരില്‍, പട്ടികജാതി സ്ത്രീകള്‍ 46 പേരും പട്ടികവര്‍ഗ സ്ത്രീകള്‍ എട്ടു പേരും ഉള്‍പ്പെടും. ജനറല്‍ വിഭാഗത്തില്‍ 470 പേരാണ് അധ്യക്ഷന്മാരാവുക. ഇവരിലും 46 പട്ടികജാതിക്കാരും എട്ട് പട്ടികവര്‍ഗക്കാരുമുണ്ടാകും. 152 ബ്ലോക്ക് പഞ്ചായത്തുകളില്‍ ജനറല്‍ വനിതാ വിഭാഗത്തില്‍ 77 പേര്‍ പ്രസിഡന്റുമാരാകും. ഇവരില്‍ എട്ട് പട്ടികജാതിയിലുള്ള സ്ത്രീകളും രണ്ട് പട്ടികവര്‍ഗ സ്ത്രീകളുമുണ്ടാകും. ജനറല്‍ വിഭാഗത്തില്‍ 75 അധ്യക്ഷന്മാരെയും നറുക്കെടുപ്പിലൂടെ കണ്ടെത്തും. ഇവരിര്‍ പട്ടികജാതിയില്‍നിന്ന് ഏഴ് പേരും പട്ടികവര്‍ഗത്തില്‍പ്പെട്ട ഒരാളും ഉള്‍പ്പെടും.  ആകെയുള്ള 14 ജില്ലാ പഞ്ചായത്തുകളില്‍ ഏഴിടങ്ങളിലും വനിതകളാകും പ്രസിഡന്റുമാര്‍. ആറിടങ്ങളില്‍ ജനറല്‍ വിഭാഗത്തിലുള്ളവരും ഒരിടത്ത് മാത്രം പട്ടികജാതി വിഭാഗത്തില്‍പ്പെട്ടയാളും പ്രസിഡന്റാകും. 87 നഗരസഭകളില്‍ 44 ഇടങ്ങളില്‍ സ്ത്രീകാളാകും ചെയര്‍പേഴ്‌സനാവുക. ഇവരില്‍ മൂന്നു പേര്‍ പട്ടികജാതിയില്‍ നിന്നുള്ളവരായിരിക്കും. ശേഷിക്കുന്ന 43 ഇടങ്ങളില്‍ ജനറലായിരിക്കും. ഇവയില്‍ മൂന്നു പേര്‍ പട്ടികജാതിയില്‍ നിന്നും ഒരാള്‍ പട്ടികവര്‍ഗത്തില്‍ നിന്നുമാകും.