ന്യൂഡല്‍ഹി: ഹാത്രസില്‍ ദലിത് പെണ്‍കുട്ടിയെ ബലാത്സംഗം ചെയ്ത് കൊലപ്പെടുത്തിയ സംഭവം ദുരഭിമാനകൊലയാണെന്ന ബി.ജെ.പി വനിതാ നേതാവിന്റെ പ്രസ്താവനക്കെതിരെ രൂക്ഷവിമര്‍ശനവുമായി മുതിര്‍ന്ന അഭിഭാഷകനും സാമൂഹ്യപ്രവര്‍ത്തകനുമായ പ്രശാന്ത് ഭൂഷണ്‍.

'പ്രതീക്ഷിച്ച പോലെ തന്നെ ബി.ജെ.പിയുടെ വനിതാ വിഭാഗം ലൈംഗികാതിക്രമത്തിന് ഇരയായി കൊല്ലപ്പെട്ട പെണ്‍കുട്ടിയെ വീട്ടുകാര്‍ തന്നെ 'ദുരഭിമാനകൊല' ചെയ്തതാണെന്ന പറയാന്‍ തുടങ്ങിയിരിക്കുന്നു. ബി.ജെ.പിയുടെ വനിതകളുടെ അധാര്‍മികതക്ക് ഒരു പരിധിയില്ലേ? ഇവര്‍ക്ക് നാണക്കേട് തോന്നുന്നില്ലേ'- അദ്ദേഹം ട്വീറ്റ് ചെയ്തു.

ബി.ജെ.പിയുടെ വനിതാ വിഭാഗമായ മഹിളാ മോര്‍ച്ചയുടെ ദേശീയ നേതാവ് പ്രീതി ഗാന്ധിയുടെ ട്വീറ്റിന് മറുപടിയായാണ് പ്രശാന്ത് ഭൂഷന്റെ ട്വീറ്റ്.

As expected, BJP's women's wing now calls Hathras rape victim's death an 'honour killing' by her own family! Is there no shame or limit to the extent of depravity among BJP's women? https://t.co/QqOCGnyDJE

— Prashant Bhushan (@pbhushan1) October 7, 2020

'ഹാത്രസ് പെണ്‍കുട്ടിയും പ്രതിയും തമ്മില്‍ 2019 ഒക്ടോബര്‍ മുതല്‍ 2020 മാര്‍ച്ച് വരെ നൂറിലേറെ ഫോണ്‍കോളുകള്‍ നടത്തിയിട്ടുണ്ടെന്നാണ് അവരുടെ കാള്‍ റെക്കോര്‍ഡ് കാണിക്കുന്നത്. ദലിതര്‍ക്കെതിരെ നടന്ന അതിക്രമമായും കൂട്ടബലാത്സംഗമായും ചിത്രീകരിക്കുന്ന സംഭവം യഥാര്‍ത്ഥത്തില്‍ ദുരഭിമാനകൊലയായിക്കൂടെ'എന്നായിരുന്നു പ്രീതി ഗാന്ധിയുടെ ട്വീറ്റ്.

കൊല്ലപ്പെട്ട പെണ്‍കുട്ടിയും പ്രതിയും തമ്മില്‍ നൂറിലേറെ ഫോണ്‍കോളുകള്‍ നടത്തിയതിന്റെ തെളിവുകളുണ്ടെന്ന് കഴിഞ്ഞ ദിവസം യു.പി പൊലിസ് അറിയിച്ചിരുന്നു. എന്നാല്‍ യു.പി പൊലിസിന്റെ വാദങ്ങള്‍ നിഷേധിച്ചുക്കൊണ്ട് പെണ്‍കുട്ടിയുടെ കുടുംബാംഗങ്ങള്‍ രംഗത്തെത്തിയിരുന്നു. കോള്‍ റെക്കോഡ് വിവരങ്ങള്‍ വ്യാജമാണെന്ന് സഹോദരന്‍ പറഞ്ഞിരുന്നു. യു.പി പൊലിസിന്റെ വാദത്തിനെതിരെ ശക്തമായ പ്രതിഷേധവും ഉയരുന്നുണ്ട്.