ന്യൂഡല്‍ഹി: പ്രതിപക്ഷ മുന്നേറ്റത്തില്‍ നിര്‍ണായകമാകുമെന്ന് കരുതിയിരുന്ന ഉത്തര്‍പ്രദേശിലെയും ബിഹാറിലെയും മഹാസഖ്യങ്ങള്‍ കടപുഴകി. ഉത്തര്‍പ്രദേശില്‍ ചെറിയ തിരിച്ചടിയ്ക്കിടയിലും ബി.ജെ.പി മികച്ച പ്രകടനം നടത്തിയപ്പോള്‍ ബിഹാറില്‍ കഴിഞ്ഞ തവണത്തേക്കാള്‍ മികച്ച പ്രകടനമാണ് എന്‍.ഡി.എ നടത്തിയത്.

ഉത്തര്‍പ്രദേശിലെ ബി.എസ്.പി-എസ്.പി മഹാസഖ്യം 19 സീറ്റുകളിലേക്ക് ഒതുങ്ങിയപ്പോള്‍ ബിഹാറിലെ കോണ്‍ഗ്രസ്- ആര്‍.ജെ.ഡി സഖ്യം ഒരു സീറ്റ് മാത്രമാണ് നേടിയത്. കിഷന്‍ ഗഞ്ചിലെ കോണ്‍ഗ്രസ് സ്ഥാനാര്‍ഥി ഡോക്ടര്‍ മുഹമ്മദ് ജവാദ് മാത്രമാണ് ഇവിടെ വിജയിച്ചത്. ആര്‍.ജെ.ഡിക്ക് ഒരു സീറ്റ് പോലും കിട്ടിയില്ല.

 ജാതികളെ പ്രതിനിധീകരിച്ചിരുന്ന മഹാസഖ്യം അഭേദ്യമായ കോട്ടയാണെന്നാണ് കരുതപ്പെട്ടിരുന്നത്. 2014ല്‍ അപ്നാദള്‍-ബി.ജെ.പി സഖ്യം 73 സീറ്റുകളിലാണ് ഉത്തര്‍പ്രദേശില്‍ വിജയിച്ചത്. അതില്‍ 71 സീറ്റുകള്‍ ബി.ജെ.പി ഒറ്റക്കു നേടി.

ഇത്തവണ ബി.ജെ.പിയുടെ സീറ്റ് 60ല്‍ എത്തിയെങ്കിലും ഇത്രയും സീറ്റുകള്‍ നേടാനായത് വലിയ കാര്യമായാണ് ബി.ജെ.പി കരുതുന്നത്. ഇതിലും കൂടുതല്‍ സീറ്റുകള്‍ നഷ്ടപ്പെടുമെന്ന കണക്കുകൂട്ടലായിരുന്നു ബി.ജെ.പിക്കുണ്ടായിരുന്നത്. മുസ്്‌ലിം, ദലിത്, ജാട്ട് വിഭാഗങ്ങളുടെ വോട്ടുകള്‍ 70 വരുന്ന പശ്ചിമ ഉത്തര്‍പ്രദേശിലെ മുസാഫര്‍നഗറിലടക്കം ബി.ജെ.പി സ്ഥാനാര്‍ഥി വിജയിച്ചു.

അഖിലേഷ് യാദവിന്റെ ഭാര്യയും നിലവില്‍ എം.പിയുമായ ഡിംബിള്‍ യാദവ് കന്നൗജ് മണ്ഡലത്തിലും പരാജയപ്പെട്ടു. അഖിലേഷ് യാദവ് അസംഗഢില്‍ നിന്ന് വിജയിച്ചങ്കിലും പിതാവ് മുലായം സിംഗ് യാദവ് മൈന്‍പുരിയില്‍ നിന്ന് കഷ്ടിച്ച് കരകയറുകയായിരുന്നു.
ബിഹാറില്‍ 2014ല്‍ ഘടകകക്ഷിയായിരുന്ന ഉപേന്ദ്ര കുശവാഹയുടെ ആര്‍.എല്‍.എസ്.പി മുന്നണി വിട്ടതൊന്നും എന്‍.ഡി.എയെ ഒട്ടും ബാധിച്ചില്ല.