നാദാപുരം: കൈനാട്ടി നാദാപുരം റോഡ് നവീകരണ പ്രവൃത്തി ആരംഭിക്കാനിരിക്കെ ഭൂമിയേറ്റെടുക്കലുമായി ബന്ധപ്പെട്ട് വിവിധ പ്രദേശങ്ങളില്‍ പ്രതിഷേധം.
കൈനാട്ടി മുതല്‍ നാദാപുരം വരെ പന്ത്രണ്ട് മീറ്റര്‍ വീതിയില്‍ നവീകരണം നടത്താനാണ് എസ്റ്റിമേറ്റ് തയ്യാറാക്കിയിരിക്കുന്നത്.
ഇതിനായി നാല്‍പത്തിയൊന്ന് കോടി രൂപയും വകയിരുത്തിയിട്ടുണ്ട് .വടകര കുറ്റ്യാടി , നാദാപുരം നിയോജക മണ്ഡലങ്ങളിലെ ആറ് ഗ്രാമപഞ്ചായത്തുകളിലൂടെയാണ് റോഡ് കടന്നു പോകുന്നത് .
ഇതില്‍ നാദാപുരം ബസ് സ്റ്റാന്‍ഡ് മുതല്‍ കുറ്റ്യാടി , വരെ വര്‍ഷങ്ങള്‍ക്ക് മുന്‍പ് പരിഷ്‌കരണ പ്രവൃത്തി പൂര്‍ത്തീകരിച്ചിരുന്നു.
പുറമേരി , എടച്ചേരി,ഒഞ്ചിയം,ഏറാമല,ചോറോട്, ഒഞ്ചിയം പഞ്ചായത്തുകളിലെ നിര്‍മാണ ജോലിയാണ് ഇപ്പോള്‍ ആരംഭിക്കാനിരിക്കുന്നത്.
പ്രദേശത്തെ ഭൂഉടമകളും കച്ചവടക്കാരുമാണ് എതിര്‍പ്പുമായി രംഗത്തുള്ളത്. റോഡ് വീതി കൂട്ടുമ്പോള്‍നഷ്ടപ്പെടുന്ന ഭൂമിക്കും കടകള്‍ക്കും അര്‍ഹമായ നഷ്ടപരിഹാരം ലഭിക്കണമെന്നാണ് ഇവരുടെ ആവശ്യം.
പുറമേരി വാട്ടര്‍ ടാങ്ക് പരിസരത്തെ പുറംപോക്ക് ഭൂമി റോഡ് വികസനത്തിന് വേണ്ടി ഏറ്റെടുക്കാത്തതിനെ ചൊല്ലിയും തര്‍ക്കമുണ്ട്. വാട്ടര്‍അതോറിറ്റിയുടെ കൈവശമുള്ള ഭൂമി ഏറ്റെടുക്കാന്‍ കഴിയുകയില്ലെന്നും ഏറ്റെടുക്കാന്‍ വാട്ടര്‍ അതോറിറ്റിയുടെ പ്രത്യേക അനുമതി വേണമെന്നുമാണ് ഉദ്യേഗസ്ഥര്‍ പറയുന്നത്.
വടകരനിന്നും മാനന്തവാടിയിലേക്കും ബംഗുളുവുരുവിലേക്കുമുള്ള എളുപ്പവഴിയായി ഉപയോഗിക്കുന്നത് ഇത് വഴിയാണ്.
റോഡിന്റെ വീതിക്കുറവ് കാരണംഎപ്പോഴും ഗതാഗത കുരുക്ക് പതിവാണ് . പ്രശ്‌നം പരിഹരിക്കാന്‍ മൂന്ന് വര്‍ഷം മുന്‍പ് അനുവദിച്ച ഫണ്ടാണ് തര്‍ക്കങ്ങളും സ്ഥല ലഭ്യതയുടെ കുറവും കാരണം ഇഴയുന്നത്