ആതവനാട്: മലപ്പുറം ആതവനാട് മിനിലോറി വെള്ളക്കെട്ടിലേക്ക് മറിഞ്ഞു. ലോറി പൂർണ്ണമായും വെള്ളത്തിൽ മുങ്ങിത്താഴ്ന്നു. ഇന്ന് ഉച്ചയക്ക് ഒരുമണിയോടെയായിരുന്നു അപകടം. ആതവനാട് ഊരോത്ത് പള്ളിയാലിലാണ് മിനിലോറി മറിഞ്ഞത്.

ലോറി ഡ്രൈവർ ജാഫറിനെയാണ് നാട്ടുകാരും ഫയർഫോഴ്‌സും ചേർന്ന് പുറത്തെത്തിച്ചത്. എന്നാൽ, വാഹനത്തിലുണ്ടായിരുന്ന സഹായി മുസ്തഫയ്ക്കായി തിരച്ചിൽ തുടരുകയാണ്. ഇയാൾ ലോറിക്കുള്ളിൽ കുടുങ്ങിക്കിടക്കുകയാണെന്നാണ് സംശയിക്കുന്നത്.

ALSO READ: ചൂരൽമല-മുണ്ടക്കൈ വ്യാപാരികൾക്ക് താങ്ങായി പ്രിയങ്ക ഗാന്ധി; സർക്കാർ സഹായം ലഭിക്കാത്ത 40 കടയുടമകൾക്ക് 5 ലക്ഷം രൂപ വീതം ധനസഹായം

രക്ഷാപ്രവർത്തനത്തിന് വെല്ലുവിളിയായി വെള്ളക്കെട്ടും പ്ലാസ്റ്റിക് മാലിന്യവും

ഏകദേശം 65 അടി താഴ്ചയുള്ള പഴയ ക്വാറിയിലെ വെള്ളത്തിലേക്കാണ് ലോറി പതിച്ചത്. വീണ ഉടൻ തന്നെ വാഹനം പൂർണ്ണമായും വെള്ളത്തിനടിയിലായി. മാലിന്യവും പ്ലാസ്റ്റിക്കും നിറഞ്ഞ ക്വാറിയിലെ ആഴമേറിയ വെള്ളക്കെട്ട് രക്ഷാപ്രവർത്തനത്തെ സങ്കീർണ്ണമാക്കുന്നു. തിരൂരിൽ നിന്നുള്ള ഫയർഫോഴ്‌സ് യൂണിറ്റും സ്‌കൂബ ഡൈവേഴ്‌സും സ്ഥലത്തെത്തി വെള്ളത്തിനടിയിൽ ലോറി കണ്ടെത്താനുള്ള തീവ്രശ്രമത്തിലാണ്.

വാഹനത്തിന്റെ ബ്രേക്ക് നഷ്ടപ്പെട്ടതാണ് അപകടത്തിന് കാരണമായതെന്നാണ് പ്രാഥമിക നിഗമനം. വെള്ളത്തിൽ താഴ്ന്നുപോയ ലോറി ഉയർത്താൻ ആവശ്യമായ വലിയ ക്രെയിൻ സ്ഥലത്തെത്താൻ വൈകുന്നത് രക്ഷാപ്രവർത്തനത്തിന്റെ വേഗത കുറയ്ക്കുന്നുണ്ട്. ലോറി കണ്ടെത്താനും മുസ്തഫയെ പുറത്തെടുക്കാനും നാട്ടുകാരും അധികൃതരും ഒത്തൊരുമിച്ച് പരിശ്രമിക്കുകയാണ്.