തിരുവനന്തപുരം: മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറിനെ മെഡിക്കല്‍ കോളജ് ആശുപത്രിയിലേക്ക് മാറ്റുന്നതിനിടെ മാധ്യമപ്രവര്‍ത്തകര്‍ക്ക് മര്‍ദനം. പി.ആര്‍.എസ് ആശുപത്രിക്ക് മുന്നില്‍ ശിവശങ്കറിന്റെ ദൃശ്യങ്ങള്‍ ചിത്രീകരിക്കാന്‍ ശ്രമിക്കുന്നതിനിടെയാണ് അഞ്ച് മാധ്യമപ്രവര്‍ത്തകര്‍ക്ക് മര്‍ദനമേറ്റത്. അക്രമം നടത്തിയ ആശുപത്രി ജീവനക്കാരന്‍ തൈക്കാട് മോസ്‌ക് റോഡ് ഇ.ടി ടവറിന് പുറകുവശത്തെ കിരണി(30) നെ കരമന പൊലിസ് അറസ്റ്റ് ചെയ്തു.

 സുപ്രഭാതം ഫോട്ടോഗ്രാഫര്‍ ടി.കെ ദീപപ്രസാദ്, കൈരളി ടി.വി കാമറ വുമണ്‍ ഷാജില, കൈരളി ടി.വി റിപ്പോര്‍ട്ടര്‍ ഷീജ, അമൃത ടി.വി കാമറമാന്‍ സുരേഷ്, സിറാജ് ഫോട്ടോഗ്രാഫര്‍ ശിവജികുമാര്‍ എന്നിവര്‍ക്കാണ് മര്‍ദനമേറ്റത്. മൂന്ന് കാമറകള്‍ക്കും കേടുപാടുണ്ടായി.

 ശിവശങ്കറിനെ ആശുപത്രി മാറ്റുന്ന വിവരം അറിഞ്ഞ് എത്തിയ മാധ്യമ പ്രവര്‍ത്തകര്‍ രോഗികളെ പുറത്തേക്ക് കൊണ്ടുവരുന്ന ഭാഗത്ത് കാത്തിരുന്നപ്പോള്‍ ജീവനക്കാര്‍ ക്ഷോഭിച്ചു. തുടര്‍ന്ന് പുറത്തേക്കുള്ള വഴിയില്‍ നിര്‍ത്തിയിട്ടിരുന്ന ആംബുലന്‍സ് വേഗത്തില്‍ അത്യാഹിത വിഭാഗത്തിലേക്ക് രോഗികളെ പ്രവേശിപ്പിക്കുന്ന വാതിലിന് സമീപമെത്തിച്ച് ശിവശങ്കറിനെ കയറ്റിക്കൊണ്ടു പോകുകയായിരുന്നു. ഇതിനിടെ ദൃശ്യങ്ങള്‍ പകര്‍ത്തിക്കൊണ്ടിരുന്ന മാധ്യമപ്രവര്‍ത്തകരെ ആശുപത്രി ജീവനക്കാരന്‍ കിരണ്‍ ആക്രമിച്ചു. മാധ്യമപ്രവര്‍ത്തകരുടെ ഭാഗത്തു നിന്നുള്ള പ്രതിഷേധത്തെ തുടര്‍ന്ന് ഇയാള്‍ ആശുപത്രിക്കുള്ളിലേക്ക് ഓടിക്കയറി. 

തുടര്‍ന്ന് ആശുപത്രിക്ക് മുന്നില്‍ മാധ്യമപ്രവര്‍ത്തകര്‍ അക്രമിയെ അറസ്റ്റ് ചെയ്യണമെന്നാവശ്യപ്പെട്ട് പ്രതിഷേധിച്ചു. മാധ്യമപ്രവര്‍ത്തകരുടെ പരാതിയില്‍ കേസെടുക്കുമെന്ന് പറഞ്ഞ പൊലിസ് എന്നാല്‍ ഇയാളെ അറസ്റ്റ് ചെയ്യാന്‍ തയാറായില്ല. ശക്തമായ പ്രതിഷേധമുയര്‍ന്നതോടെ ഉന്നത ഉദ്യോഗസ്ഥരെത്തി അറസ്റ്റ് ചെയ്യുമെന്ന് ഉറപ്പു നല്‍കി. ഇതോടെയാണ് പ്രതിഷേധമവസാനിപ്പിച്ച് മാധ്യമപ്രവര്‍ത്തകര്‍ പിരിഞ്ഞുപോയത്. രാത്രിയോടെ കിരണിനെ കരമന പൊലിസ് അറസ്റ്റ് ചെയ്തു.