ലഖ്‌നൗ: സമാജ് വാദി പാര്‍ട്ടി നേതാവ് രമേശ് യാദവിന്റെ മരുമകന്‍ സ്റ്റേഷനില്‍ വച്ച് സബ് ഇന്‍സ്‌പെക്ടറെ മര്‍ദിച്ചു. ആശുപത്രിയില്‍ വി.ഐ.പി ചികിത്സ ലഭിക്കണമെന്നാവശ്യപ്പെട്ട് ജീവനക്കാരെ ആക്രമിച്ചതിന് പിടിയിലായ ഇദ്ദേഹത്തെ സ്റ്റേഷനില്‍ എത്തിച്ചപ്പോഴായിരുന്നു 24കാരനായ മോഹിത് യാദവ് സബ് ഇന്‍സ്‌പെക്ടര്‍ ജിതേന്ദ്രകുമാറിനെ മര്‍ദിച്ചത്. ഇയാളെ അറസ്റ്റ് ചെയ്തിട്ടുണ്ട്.
ആശുപത്രിയില്‍ എക്‌സ്-റെ എടുക്കാനായി ക്യൂ നില്‍ക്കാന്‍ തയാറാകാതെ തനിക്ക് വി.ഐ.പി ചികിത്സ നല്‍കണമെന്നായിരുന്നു മോഹിതിന്റെ ആവശ്യം.
ഇത് അനുവദിക്കാതിരുന്ന ലാബ് ടെക്‌നീഷ്യനെയും ഡോക്ടറെയും കൈയേറ്റം ചെയ്ത ഇയാളെ പൊലിസ് എത്തി സ്റ്റേഷനിലേക്ക് മാറ്റിയപ്പോഴാണ് താന്‍ സമാജ് വാദി പാര്‍ട്ടി നേതാവും നിയമസഭാംഗവുമായ രമേശ് യാദവിന്റെ മരുമകനാണെന്ന് പറഞ്ഞ് സബ് ഇന്‍സ്‌പെക്ടറെ മര്‍ദിച്ചത്.