കാസര്‍കോട്: മസ്ജിദില്‍ അതിക്രമിച്ചു കയറി പ്രാര്‍ഥനാ ചടങ്ങുകള്‍ തടസപ്പെടുത്താന്‍ ശ്രമിച്ച സംഭവത്തില്‍ നാലുപേര്‍ക്കെതിരേ മേല്‍പറമ്പ് പൊലിസ് കേസെടുത്തു. ചെമനാട് പരവനടുക്കം പാലിച്ചിയടുക്കത്ത് കഴിഞ്ഞ ദിവസം രാത്രിയാണ് സംഭവം. നാലംഗ സംഘമാണ് അക്രമത്തിനു പിന്നിലെന്ന് മസ്ജിദ് കമ്മിറ്റി ഭാരവാഹികള്‍ പൊലിസില്‍ നല്‍കിയ പരാതിയില്‍ പറഞ്ഞു. സംഭവത്തില്‍ നവീന്‍ എന്നയാള്‍ ഉള്‍പ്പെടെ കണ്ടാലറിയാവുന്ന നാലുപേര്‍ക്കെതിരേ കേസെടുത്തതായി മേല്‍പറമ്പ് പൊലിസ് പറഞ്ഞു.

മസ്ജിദില്‍ പ്രാര്‍ഥന നടന്നുകൊണ്ടിരിക്കെ ബൈക്കിലെത്തിയ സംഘം അതിക്രമിച്ചു കടന്ന് അസഭ്യം പറയുകയും ഭീഷണിപ്പെടുത്തുകയുമായിരുന്നു. തുടര്‍ന്ന് തിരിച്ചുപോയ സംഘം പ്രാര്‍ഥന കഴിഞ്ഞ് വിശ്വാസികള്‍ പോയതോടെ വീണ്ടും തിരികെ വന്ന് മസ്ജിദ് പറമ്പിലുണ്ടായിരുന്ന ബെഞ്ചും ഡെസ്‌കും വലിച്ചെറിഞ്ഞു നശിപ്പിച്ചതായും പരാതിയില്‍ പറയുന്നു. സംഭവത്തില്‍ പൊലിസ് അന്വേഷണം നടത്തി വരുന്നു.

കഴിഞ്ഞ ഒരാഴ്ചയിലധികമായി കാസര്‍കോട് ജില്ലയുടെ വിവിധ ഭാഗങ്ങളില്‍ സംഘ്പരിവാര്‍ പ്രവര്‍ത്തകര്‍ വിവിധ പ്രദേശങ്ങളില്‍ ഇത്തരത്തില്‍ അക്രമം നടത്തി വരികയാണെന്ന് ആരോപണമുണ്ട്. പേര് ചോദിച്ച ശേഷം യുവാക്കളെ കാറില്‍നിന്ന് വലിച്ചിറക്കി മര്‍ദിച്ച സംഭവം ഉള്‍പ്പെടെ ജില്ലയില്‍ നടന്നിരുന്നു. ഈ കേസില്‍ സംഘ്പരിവാര്‍ പ്രവര്‍ത്തകനെ പൊലിസ് അറസ്റ്റും ചെയ്തിരുന്നു. ഇതിനിടയിലാണ് ഒരു സംഘം മസ്ജിദില്‍ കയറി ഭീഷണി മുഴക്കുകയും അക്രമം കാണിക്കുകയും ചെയ്തത്.