മുംബൈ: ബി.വൈ.എല്‍ നായര്‍ മെഡിക്കല്‍ കോളജിലെ രണ്ടാം വര്‍ഷ എം.ബി.ബി.എസ് വിദ്യാര്‍ഥിനി പായല്‍ തഡ്‌വിയുടെത് ആത്മഹത്യയല്ലെന്നും കൊലപാതകമാണെന്നും ഇവരുടെ കുടുംബത്തിനുവേണ്ടി കോടതിയില്‍ ഹാജരായ അഭിഭാഷകന്‍.

കൊലപാതകത്തിന് തെളിവായി പായലിന്റെ കഴുത്തില്‍ മുറിവുണ്ടെന്നും അദ്ദേഹം മുംബൈയിലെ കോടതിയില്‍ വ്യക്തമാക്കി.
കേസില്‍ ആരോപണ വിധേയരായ മൂന്ന് മുതിര്‍ന്ന വിദ്യാര്‍ഥികളെ ഇന്നലെ കോടതിയില്‍ ഹാജരാക്കുന്നതുമായി ബന്ധപ്പെട്ട കേസ് പരിഗണിച്ചപ്പോഴാണ് പായലിന്റേത് ആത്മഹത്യയല്ലെന്നും കൊലപാതകമാണെന്നും അഭിഭാഷകന്‍ പറഞ്ഞത്. കുറ്റാരോപിതരായ വിദ്യാര്‍ഥികള്‍ മൃതദേഹം ഒരിടത്ത് കൊണ്ടിട്ടെന്നും പിന്നീട് ആശുപത്രിയില്‍ എത്തിക്കുകയുമാണ് ചെയ്തതെന്നും അഭിഭാഷകന്‍ ചൂണ്ടിക്കാട്ടി.

അതിനിടയില്‍ പായലിന്റെ മരണവുമായി ബന്ധപ്പെട്ട് വിവാദം കത്തിപ്പടരുന്ന സാഹചര്യത്തില്‍ കേസ് അന്വേഷണം ക്രൈംബ്രാഞ്ചിന് വിട്ടു. മുംബൈ ലോക്കല്‍ പൊലിസാണ് കേസ് അന്വേഷിച്ചിരുന്നത്. സംഭവം കൂടുതല്‍ വിവാദത്തിലേക്ക് തിരിഞ്ഞതോടെയാണ് അന്വേഷണം ക്രൈംബ്രാഞ്ചിന് വിട്ടത്.