കോഡൂര്‍: സംസ്ഥാന ഹയര്‍സെക്കന്‍ഡറി സ്‌കൂള്‍ തല നാഷണല്‍ സര്‍വിസ് സ്‌കീം മികച്ച യൂനിറ്റുകള്‍ക്കും പ്രോഗ്രാം ഓഫിസര്‍മാര്‍ക്കും അവാര്‍ഡുകള്‍ പ്രഖ്യാപിച്ചു. മലപ്പുറം ജില്ലയിലെ മികച്ച യൂനിറ്റായി ചെമ്മങ്കടവ് പി.എം.എസ്.എ.എം.എ. ഹയര്‍സെക്കന്‍ഡറി സ്‌കൂള്‍ യൂനിറ്റിനേയും പ്രോഗ്രാം ഓഫിസറായി ഈ സ്‌കൂളിലെ അധ്യാപകനായ എന്‍.കെ ഹഫ്‌സല്‍ റഹ്മാനെയും തിരഞ്ഞെടുത്തു. കഴിഞ്ഞ അധ്യായന വര്‍ഷം നടത്തിയ മാതൃകാപരമായ സാമൂഹ്യ, സേവന പ്രവര്‍ത്തനങ്ങള്‍ പരിഗണിച്ചാണ് അവാര്‍ഡുകള്‍ പ്രഖ്യാപിച്ചത്.
കോഡൂര്‍ ഗ്രാമപ്പഞ്ചായത്തിലെ പതിനാലാം വാര്‍ഡ് ഒറ്റത്തറയെ ദത്തെടുത്ത് വാര്‍ഡില്‍ ആരോഗ്യ സാമൂഹ്യ സേവന രംഗത്തും മണ്ണ്, ജല സംരക്ഷണ, കാര്‍ഷിക മേഖലയിലും വിവിധങ്ങളായ പ്രവര്‍ത്തനങ്ങള്‍ നടപ്പാക്കി. സ്‌കൂള്‍ പരിസരപ്രദേശങ്ങളില്‍ കിടപ്പിലായവരെ പരിചരിക്കുന്നതിനുള്ള സ്‌നേഹപൂര്‍വ്വം പദ്ധതി, ഈസ്റ്റ്‌കോഡൂരിലെ വിധവക്ക് വേണ്ടി നിര്‍മിച്ചുനല്‍കിയ സ്‌നേഹവീട്, എന്‍.എസ്.എസ്. ദത്തെടുത്ത ഒറ്റത്തറ ഗ്രാമത്തില്‍ നടപ്പാക്കിയ ആരോഗ്യ, കുടുംബ വിവരശേഖരണം, രോഗപ്രതിരോധ ബോധവല്‍ക്കരണം, റോഡ് നിര്‍മ്മാണം, കുളം ശുചീകരണം, മഴക്കുഴികളുടെ നിര്‍മ്മാണം, അങ്കണവാടി കെട്ടിടം ചായംപൂശല്‍, കുട്ടികള്‍ക്ക് നീന്തല്‍ പരിശീലനം, സോപ്പ് നിര്‍മ്മാണം, ജൈവ പച്ചക്കറി കൃഷിയും നെല്‍കൃഷിയും തുടങ്ങിയ പ്രവര്‍ത്തനങ്ങള്‍ മികവിന് കാരണമായി