ബാലുശേരി: കക്കൂസ് മാലിന്യം വയലിലേക്ക് ഒഴുക്കിവിടാന്‍ ശ്രമിക്കുന്നതിനിടെ ലോറി മറിഞ്ഞ് രണ്ടുപേര്‍ക്ക് പരുക്ക്. അത്തോളി-ഉള്ള്യേരി റൂട്ടില്‍ കൂമുള്ളി കുന്നത്തറ റോഡ് ജങ്ഷനില്‍ ഇന്നലെ പുലര്‍ച്ചെ രണ്ടിനാണ് സംഭവം.
ലോറിയില്‍ കയറ്റിക്കൊണ്ടുവന്ന മാലിന്യം ഒഴുക്കിവിടാന്‍ ശ്രമിക്കുന്നതിനിടയില്‍ ലോറി വയലിലേക്കു മറിയുകയായിരുന്നു. അപകടത്തില്‍ ലോറി ഡ്രൈവര്‍ക്കും ക്ലീനര്‍ക്കും ഗുരുതരമായി പരുക്കേറ്റു. ലോറിക്കിടയില്‍ കുടുങ്ങിപ്പോയ ഇരുവരെയും ഫയര്‍ഫോഴ്‌സ് സംഘം എത്തിയാണ് രക്ഷപ്പെടുത്തിയത്. ഇവരെ കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
 മലപ്പുറം സ്വദേശികളാണ് അപകടത്തില്‍പ്പെട്ടത്. കുറ്റ്യാടി ഭാഗത്തുനിന്നാണ് ഇവര്‍ മാലിന്യവുമായി എത്തിയതെന്നാണ് വിവരം. ലോറി മറിഞ്ഞ വിവരം നാട്ടുകാര്‍ അത്തോളി പൊലിസ് സ്‌റ്റേഷനില്‍ അറിയിക്കുകയായിരുന്നു. എസ്.ഐ രവീന്ദ്രന്‍ കൊമ്പിലാടിന്റെ നേതൃത്വത്തില്‍ പൊലിസ് സ്ഥലത്തെത്തി പരിശോധന നടത്തി.
രാവിലെയോടെ കൊയിലാണ്ടി ഡെപ്യൂട്ടി തഹസില്‍ദാര്‍ ശശിധരന്റെ സാന്നിധ്യത്തില്‍ അപകടത്തില്‍പ്പെട്ട കെ.എല്‍ 71 എ 4301  ലോറി ക്രെയിന്‍ ഉപയോഗിച്ച് ഉയര്‍ത്തി. പിന്നീട് ലോറി അത്തോളി സ്‌റ്റേഷനിലേക്ക് മാറ്റി. സംഭവത്തില്‍ കേസെടുത്തതായി എസ്.ഐ രവീന്ദ്രന്‍ കൊമ്പിലാട് അറിയിച്ചു.
പ്രദേശത്ത് ഇത്തരത്തില്‍ കക്കൂസ് മാലിന്യം മുന്‍പും ഒഴുക്കിയതായും സംഭവത്തെക്കുറിച്ച് സമഗ്രമായി അന്വേഷണം നടത്തി കുറ്റവാളികള്‍ക്കെതിരേ കര്‍ശന നടപടി സ്വീകരിക്കണമെന്ന് നാട്ടുകാര്‍ ആവശ്യപ്പെട്ടു.