ന്യൂഡല്‍ഹി: അരുണാചല്‍ പ്രദേശില്‍ കാണാതായ വ്യോമസേനയുടെ വിമാനത്തിനായുള്ള തിരച്ചില്‍ തുടരുന്നു. സൈന്യത്തിനൊപ്പം ഐ.എസ്.എ.എസ്.ആര്‍.ഒയും ചേര്‍ന്നു. അവരുടെ റിസാറ്റ് സീരീസിലുള്ള റഡാര്‍ ഇമേജിങ് സാറ്റലൈറ്റിന്റെ സേവനമാണ് തിരച്ചിലിനായി ഉപയോഗിക്കുന്നത്. വടക്ക് കിഴക്കന്‍ ഭാഗങ്ങളിലുള്ള മേഘാവൃതമായ അന്തരീക്ഷം തിരച്ചിലിന് തടസ്സമാവുന്നുണ്ട്.
അസമിലെ ജോര്‍ഹത്തില്‍ നിന്ന് പറന്നുയര്‍ന്ന ആന്റനോവ് എ.എന്‍ 32 എന്ന വിമാനമാണ് തിങ്കളാഴ്ച കാണാതായത്. ഏഴ് വ്യോമസേന ഉദ്യോഗസ്ഥരും ആറ് ജവാന്‍മാരുമടക്കം 13 പേരായിരുന്നു വിമാനത്തിലുണ്ടായിരുന്നത്. അരുണാചല്‍ പ്രദേശിലെ മെന്‍ചുക്ക അഡ്വാന്‍സ് ലാന്‍ഡിങ് ഗ്രൗണ്ടിലേക്ക് ഉച്ചക്ക് 12.25ഓടു കൂടിയായിരുന്നു വിമാനം യാത്ര തിരിച്ചത്. ഉച്ചക്ക് ഒന്നോടെയാണ് വിമാനവുമായുള്ള ബന്ധം വിച്ഛേദിക്കപ്പെട്ടത്.