ന്യൂഡല്‍ഹി: ഡല്‍ഹി ഡയര്‍ഡെവിള്‍സിനെ പത്ത് റണ്‍സിന് കീഴടക്കി റോയല്‍ ചലഞ്ചേഴ്‌സ് ബാംഗ്ലൂര്‍ ആശ്വാസം കൊണ്ടു. തുടര്‍ തോല്‍വികള്‍ക്കൊടുവിലാണ് ബാംഗ്ലൂരിന്റെ വിജയം. ടോസ് നേടി ബാറ്റ് ചെയ്ത് ബാംഗ്ലൂര്‍ 20 ഓവറില്‍ ആറ് വിക്കറ്റ് നഷ്ടത്തില്‍ 161 റണ്‍സെടുത്തു. ജയം തേടിയിറങ്ങിയ ഡല്‍ഹിയുടെ പോരാട്ടം 20 ഓവറില്‍ 151 റണ്‍സില്‍ അവസാനിച്ചു. മുന്‍നിര ബാറ്റ്‌സ്മാന്‍മാരായ റിഷഭ് പന്ത് (45), ശ്രേയസ് അയര്‍ (32), കരുണ്‍ നായര്‍ (26) എന്നിവര്‍ പൊരുതി. ഒന്‍പതാമനായി ഇറങ്ങിയ മുഹമ്മദ് ഷമി ഒന്‍പത് പന്തില്‍ 21 റണ്‍സെടുത്ത് പ്രതീക്ഷ നല്‍കിയെങ്കിലും വിജയിപ്പിക്കാനായില്ല. ബാംഗ്ലൂരിനായി ഹര്‍ഷല്‍ പട്ടേല്‍ മൂന്ന് വിക്കറ്റും ഹെഡ്ഡ്, നെഗി എന്നിവര്‍ രണ്ട് വിക്കറ്റും വീഴ്ത്തി.
ആദ്യം ബാറ്റ് ചെയ്ത ബാംഗ്ലൂരിനായി ക്രിസ് ഗെയ്‌ലിനൊപ്പം മലയാളി താരം വിഷ്ണു വിനോദ് ഓപണിങില്‍ ഇറങ്ങി. ഒന്‍പത് പന്ത് നേരിട്ട വിഷ്ണു മൂന്ന് റണ്‍സുമായി പുറത്തായി. പിന്നീട് ഗെയ്ല്‍- നായകന്‍ വിരാട് കോഹ്‌ലി സഖ്യം പോരാട്ടം ഡല്‍ഹി ക്യാംപിലേക്ക് നയിച്ചു. 38 പന്തില്‍ മൂന്ന് വീതം ഫോറും സിക്‌സും പറത്തി ഗെയ്ല്‍ 48 റണ്‍സെടുത്തു. കോഹ്‌ലി 45 പന്തില്‍ മൂന്ന് വീതം ഫോറും സിക്‌സുമടിച്ച് 58 റണ്‍സും അടിച്ചെടുത്തു. മലയാളി താരം സച്ചിന്‍ ബേബി എട്ട് പന്തില്‍ രണ്ട് ഫോറുകളടിച്ച് 12 റണ്‍സെടുത്തു. ഡല്‍ഹിക്കായി പാറ്റ് കമ്മിന്‍സ് രണ്ടും സഹീര്‍ ഖാന്‍, നദീം എന്നിവര്‍ ഓരോ വിക്കറ്റും വീഴ്ത്തി.