ഉരുവച്ചാല്‍: കുടിവെള്ളത്തിനായി നെട്ടോട്ടമോടുന്ന കയനി, ബാവോട്ടുപാറ, കരുവച്ചാല്‍, പാറേക്കാട് ഗ്രാമവാസികള്‍ക്ക് ആശ്വാസമേകി പ്രവാസികളായ നാട്ടുകാരുടെ കുടിവെള്ളവിതരണം. ഗള്‍ഫില്‍ ജോലിചെയ്യുന്ന കയനി, ബാവോട്ടുപാറ, പെരിഞ്ചേരി, മണക്കായി പ്രദേശങ്ങളിലെ പ്രവാസികളുടെ കൂട്ടായ്മയായ അല്‍ ഖിദ്മ ചാരിറ്റി ഗ്രൂപ്പാണ് ദിവസവും സൗജന്യമായി കുടിവെള്ളം വിതരണം ചെയ്യുന്നത്. കഴിഞ്ഞ വര്‍ഷം കയനി ലക്ഷംവീട് കോളനി പരിസരത്ത് നിര്‍മിച്ച് നല്‍കിയ പൊതു കിണറില്‍നിന്നുമാണ് പരിസരത്തെ വീടുകളിലേക്ക് വെള്ളമെടുക്കുന്നത്. അല്‍ ഖിദ്മയുടെ രണ്ടാമത്തെ പൊതുകിണര്‍ പാറേക്കാട് നിര്‍മിച്ച് നല്‍കുമെന്ന് സെക്രട്ടറി ഷഫീഖ് കയനി പറഞ്ഞു. ടി.പി ഇസ്മാഈല്‍, സലാം ചേരിക്കല്‍, സഫീര്‍ ഖത്തര്‍, റഹീം എന്നിവര്‍ കുടിവെള്ള വിതരണത്തിന് നേതൃത്വം നല്‍കി.