ന്യൂഡല്‍ഹി: സുപ്രിംകോടതിയില്‍ സുദര്‍ശന്‍ ടി.വിയുമായി ബന്ധപ്പെട്ട കേസില്‍ വാദം നടക്കുന്നതിനിടെ അഭിഭാഷകന്‍ ഹാജരായത് ഷര്‍ട്ടിടാതെ. വിഡിയോ കോണ്‍ഫറന്‍സ് വഴി നടന്ന വാദത്തിനിടെയാണ് അഭിഭാഷകന്‍ ഷര്‍ട്ടിടാതെ ഹാജരായത്. ഇതോടെ, ജഡ്ജിമാര്‍ അഭിഭാഷകനെ ശാസിച്ച് രംഗത്തെത്തി.
തിങ്കളാഴ്ചയായിരുന്നു സംഭവം. സുദര്‍ശന്‍ ടി.വിയുമായി ബന്ധപ്പെട്ട് നടന്ന വാദത്തിനിടെയാണ് ഒരു അഭിഭാഷകന്‍ ഷര്‍ട്ടിടാതെ വിഡിയോയില്‍ പ്രത്യക്ഷപ്പെട്ടത്. ഇതോടെ, കേസ് പരിഗണിച്ചിരുന്ന ജസ്റ്റിസ് ഡി.വൈ ചന്ദ്രചൂഢ്, ജസ്റ്റിസ് ഇന്ദു മല്‍ഹോത്ര എന്നിവര്‍ അതൃപ്തി രേഖപ്പെടുത്തി രംഗത്തെത്തി. ഇത്തരം കാര്യങ്ങള്‍ ക്ഷമിക്കാവുന്നവയല്ലെന്നായിരുന്നു ജഡ്ജിമാര്‍ അഭിപ്രായപ്പെട്ടത്. അഭിഭാഷകനെതിരേ കോടതി മറ്റെന്തെങ്കിലും നടപടിയെടുത്തതായി റിപ്പോര്‍ട്ടില്ല.
അതേസമയം, കൊവിഡ് വ്യാപനം കാരണം വിഡിയോ കോണ്‍ഫറന്‍സിങ് വഴി വാദം നടക്കുന്നതിനിടെ വിവിധ കോടതികളില്‍ ഇത്തരം സംഭവങ്ങള്‍ മുന്‍പും നടന്നിട്ടുണ്ടെന്നാണ് വിവരം. നേരത്തെ മുതിര്‍ന്ന അഭിഭാഷകന്‍ രാജീവ് ധവാന്‍ വാദത്തിനിടെ പുകവലിച്ചതും വിവാദമായിരുന്നു.