സ്വന്തം ലേഖകന്‍
തിരുവനന്തപുരം: കേന്ദ്ര അന്വേഷണ ഏജന്‍സി അറസ്റ്റ് ചെയ്യുന്ന കേരളത്തിലെ ആദ്യ ഐ.എ.എസ് ഓഫിസറാണ് ശിവശങ്കര്‍. മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറിയായിരുന്ന ഉദ്യോഗസ്ഥനെ അറസ്റ്റ് ചെയ്യുന്നതും ഇതാദ്യം.
അഴിമതിക്കേസില്‍ ജയിലിലായ കേരളത്തിലെ ആദ്യ ഐ.എ.എസ് ഓഫിസര്‍ പൊതുമരാമത്ത് മുന്‍ സെക്രട്ടറി ടി.ഒ. സൂരജാണ്. പാലാരിവട്ടം മേല്‍പ്പാലം നിര്‍മാണത്തില്‍ അഴിമതി കണ്ടെത്തിയെന്ന വിജിലന്‍സ് റിപ്പോര്‍ട്ടിനെത്തുടര്‍ന്നാണ് സൂരജിനെ റിമാന്‍ഡ് ചെയ്തത്. സര്‍വിസില്‍ നിന്ന് വിരമിച്ച ശേഷമായിരുന്നു അറസ്റ്റ്.
തിരുനെല്ലിക്കാട്ടില്‍ നക്‌സലൈറ്റ് നേതാവ് വര്‍ഗീസിനെ വെടിവച്ചു കൊന്നെന്ന കോണ്‍സ്റ്റബിള്‍ രാമചന്ദ്രന്‍നായരുടെ 1998ലെ വെളിപ്പെടുത്തലോടെ മുന്‍ ഐ.ജി ലക്ഷ്മണ കേസില്‍ പ്രതിയായി ജയിലിലായിരുന്നു. 2010ല്‍ ജീവപര്യന്തം ശിക്ഷ ലഭിച്ചെങ്കിലും പ്രതിയുടെ അനാരോഗ്യം കണക്കിലെടുത്ത് സര്‍ക്കാര്‍ ശിക്ഷ ഇളവു ചെയ്തതോടെ ജയില്‍ മോചിതനായി. അഴിമതിക്കേസില്‍ മുന്‍ ഡി.ജി.പി ജേക്കബ് തോമസിനെ വിജിലന്‍സ് പ്രതിചേര്‍ത്തിരുന്നു. സര്‍ക്കാരിനെ വിമര്‍ശിച്ചതിനെത്തുടര്‍ന്ന് ദീര്‍ഘനാള്‍ സസ്‌പെന്‍ഷനിലായതിനു ശേഷം അദ്ദേഹം ഈ വര്‍ഷം വിരമിച്ചു. ലാവ്‌ലിന്‍ കേസില്‍ മുന്‍ ഊര്‍ജ വകുപ്പ് പ്രിന്‍സിപ്പല്‍ സെക്രട്ടറി മോഹനചന്ദ്രന്‍ പ്രതിയായി.
കാലടി സര്‍വകലാശാല ഭൂമി ഇടപാടുമായി ബന്ധപ്പെട്ട് ചീഫ് സെക്രട്ടറി ആര്‍. രാമചന്ദ്രന്‍ നായരെ 1997 ജനുവരി 10ന് സര്‍ക്കാര്‍ സസ്‌പെന്‍ഡ് ചെയ്തിരുന്നു. വിജിലന്‍സ് കേസ് റജിസ്റ്റര്‍ ചെയ്തതിനെത്തുടര്‍ന്നായിരുന്നു ഇ.കെ നായനാര്‍ സര്‍ക്കാരിന്റെ നടപടി. ഹൈക്കോടതിയിലെ കേസുകള്‍ തള്ളിപ്പോയതിനെത്തുടര്‍ന്ന് 2018 മെയ് ഏഴിനു പെന്‍ഷന്‍ ആനുകൂല്യങ്ങള്‍ പൂര്‍ണമായി നല്‍കാന്‍ എല്‍.ഡി.എഫ് സര്‍ക്കാര്‍ തന്നെ ഉത്തരവിട്ടു.
ചാരക്കേസിലെ ആരോപണങ്ങള്‍ തള്ളിക്കളയാനാവില്ലെന്ന ഹൈക്കോടതി പരാമര്‍ശത്തെത്തുടര്‍ന്ന് അന്ന് ഐ.ജിയായിരുന്ന രമണ്‍ ശ്രീവാസ്തവയെ സസ്‌പെന്‍ഡ് ചെയ്തിരുന്നു. കേസില്‍ പ്രതിയായില്ല. എന്‍ജിനിയറിങ് വിദ്യാര്‍ഥി രാജന്‍ അടിയന്തരാവസ്ഥക്കാലത്ത് കൊല്ലപ്പെട്ട കേസില്‍ ഡി.ഐ.ജിയായിരുന്ന ജയറാം പടിക്കല്‍ ഉള്‍പ്പെടെയുള്ള ഉദ്യോഗസ്ഥര്‍ക്ക് വിചാരണ നേരിടേണ്ടിവന്നു.