കൊച്ചി: കര്‍ദിനാള്‍ മാര്‍ ജോര്‍ജ് ആലഞ്ചേരിക്കെതിരേ വ്യാജരേഖ ചമച്ചെന്ന കേസില്‍ ഒന്നും നാലും പ്രതികളായ വൈദികരുടെ മുന്‍കൂര്‍ ജാമ്യാപേക്ഷ പരിഗണിക്കുന്നത്് കോടതി ഈ മാസം 11 ലേക്ക് മാറ്റി. കേസില്‍ എതിര്‍ വാദത്തിനായി പ്രോസിക്യൂഷന്‍ കുടുതല്‍ സമയം ആവശ്യപ്പെട്ടതിനെ തുടര്‍ന്നാണ് എറണാകുളം ജില്ലാ സെഷന്‍ കോടതി കേസ് പരിഗണിക്കുന്നത് മാറ്റിയത്. വൈദികരെ അറസ്റ്റു ചെയ്യരുതെന്ന കോടതിയുടെ മുന്‍ ഉത്തരവ് അതുവരെ തുടരും.
കേസിലെ ഒന്നാം പ്രതി ഫാ.പോള്‍ തേലക്കാട്ട്, നാലാം പ്രതി ഫാ.ടോണി കല്ലൂക്കാരന്‍ എന്നിവരാണ് മുന്‍കൂര്‍ ജാമ്യം തേടി നേരത്തെ കോടതിയ സമീപിച്ചത്. തുടര്‍ന്ന്് കോടതി ഇവരോട് അന്വേഷണവുമായി സഹകരിക്കാന്‍ നിര്‍ദേശിക്കുകയായിരുന്നു. രാവിലെ 10 മുതല്‍ വൈകുന്നേരം നാലുവരെ വൈദികരെ ചോദ്യം ചെയ്യാമെന്നും ഏഴു ദിവസത്തിനുള്ളില്‍ ചോദ്യം ചെയ്യല്‍ പൂര്‍ത്തിയാക്കണമെന്നും അതുവരെ അറസ്റ്റു ചെയ്യരുതെന്നും കോടതി അന്വേഷണ സംഘത്തിന് നിര്‍ദേശം നല്‍കിയിരുന്നു.
ചോദ്യം ചെയ്യല്‍ പൂര്‍ത്തിയായതിനു ശേഷം റിപ്പാര്‍ട്ട് സമര്‍പ്പിക്കണമെന്നും കോടതി നിര്‍ദേശിച്ചിരുന്നു. നിര്‍ദേശിച്ച സമയ പരിധിയായ ഏഴു ദിവസം പൂര്‍ത്തിയായതിനെ തുടര്‍ന്നാണ് കേസ് ഇന്നലെ കോടതി വീണ്ടും പരിഗണിച്ചത്. എന്നാല്‍ അന്വേഷണ റിപ്പോര്‍ട്ട് സമര്‍പ്പിക്കാത്തതിനാല്‍ കേസിന്റെ വാദത്തിനായി കൂടുതല്‍ സമയം വേണമെന്ന് പ്രോസിക്യൂഷന്‍ അറിയിച്ചതോടെയാണ് കേസ്് പരിഗണിക്കുന്നത് 11 ലേക്ക് മാറ്റിയത്.