ഇസ്‌ലാമാബാദ്: നിയന്ത്രണം ലംഘിച്ച വിമാനം പിന്തുടരുന്നതിനിടെ പാകിസ്താന്റെ പിടിയിലായ വിങ് കമാന്‍ഡര്‍ അഭിനന്ദ് വര്‍ധ്മാനെ പരിഹസിക്കുന്ന പാകിസ്താന്റെ പരസ്യം വിവാദമാവുന്നു. ജൂണ്‍ 16ന് നടക്കുന്ന ഇന്ത്യ പാകിസ്താന്‍ മത്സരത്തിന്റെ ഭാഗമായി ജാസ് ടി.വി തയാറാക്കിയ പരസ്യമാണ് വ്യാപകമായി വിമര്‍ശനമുണ്ടാക്കിയത്. അഭിനന്ദിന് സമാനമായ മീശവച്ച ഇയാള്‍ നീല ഷര്‍ട്ടാണ് ധരിച്ചിരിക്കുന്നത്.
കാമറക്ക് മുന്നില്‍ ചോദ്യങ്ങള്‍ക്ക് മറുപടി പറയുന്ന ഇദ്ദേഹം അഭിനന്ദ് വര്‍ധ്മാന്‍ പാകിസ്താന്റെ പിടിയിലായപ്പോള്‍ പറഞ്ഞ അതേ വാക്കുകള്‍ സംസാരത്തിനിടെ ഉപയോഗിക്കുന്നുണ്ട്. ടോസ് കിട്ടിയിരുന്നെങ്കില്‍ എന്ത് ചെയ്യുമായിരുന്നു എന്ന ചോദ്യത്തിന് സോറി അത് എനിക്ക് പറയാനാവില്ലെന്ന് മറുപടി നല്‍കുന്നു. മെയിന്‍ ഇലവനില്‍ ഉണ്ടാവുമോയെന്ന ചോദ്യത്തിന് സോറി അത് എനിക്ക് മറുപടി പറയാനാവില്ലെന്നാണ് പരസ്യത്തില്‍ ഉത്തരം നല്‍കുന്നത്. ചായക്കപ്പ് കൈയില്‍ പിടിച്ചാണ് ഇയാള്‍ മറുപടി നല്‍കുന്നത്. ശരി, ചായ എങ്ങനെയുണ്ടെന്ന അടുത്ത ചോദ്യത്തിന് ചായ വളരെ നന്നായിരിക്കുന്നു എന്നാണ് മറുപടി പറയുന്നത്.
ഇതോടെ ശരി ഇനി താങ്കള്‍ക്ക് പോകാമെന്ന് പറയുന്നതോടെ കപ്പുമായി എഴുന്നേല്‍ക്കുന്ന ഇദ്ദേഹത്തോട് കപ്പും കൊണ്ട് എവിടേക്കാണ് പോകുന്നതെന്ന് ചോദിച്ച്' കപ്പ് ഇവിടെ വച്ചിട്ട് പോകൂ എന്ന് ഹാഷ് ടാഗ് ഇട്ടുകൊണ്ടായിരുന്നു പരസ്യം അവസാനിക്കുന്നത്. അതിനിടെ പരസ്യത്തിനായി ഉപയോഗിച്ചയാളുടെ മുഖത്ത് കറുത്ത മേക്കപ്പാണ് ഉപയോഗിച്ചത്. ഇത് അഭിനന്ദിനെ കറുത്തയാളാണെന്ന് കാണിക്കാനായി ഉപയോഗിച്ചതാണെന്നും ഇത് വംശീയ അധിക്ഷേപമാണെന്നുമാണ് ചിലര്‍ ചൂണ്ടിക്കാണിക്കുന്നത്.