കോഴിക്കോട്: ഡയറക്ടറേറ്റ് ഓഫ് റവന്യൂ ഇന്റലിജന്‍സ്(ഡി.ആര്‍.ഐ.)  പിടികൂടിയ 1.2 കോടി രൂപയുടെ അസാധു കറന്‍സി നോട്ടുകളെ കുറിച്ചുള്ള അന്വേഷണം അനിശ്ചിതത്വത്തില്‍. ഡി.ആര്‍.ഐ. കോഴിക്കോട് യൂണിറ്റ് കേസന്വേഷണം കോഴിക്കോട് ടൗണ്‍ പൊലിസിനു കൈമാറാന്‍ തീരുമാനിച്ചെങ്കിലും ഏറ്റെടുക്കാന്‍ പൊലിസ് തയാറായില്ല. നോട്ടുകള്‍ പിടികൂടിയ സംഭവം ടൗണ്‍ സ്‌റ്റേഷന്‍ പരിധിയിലാണ്.  വ്യാജ കറന്‍സിയോ അനധികൃതമായി കൊണ്ടുവന്ന കറന്‍സിയോ ആണെങ്കില്‍ അത് എന്‍ഫോഴ്‌സ്‌മെന്റിന് കൈമാറാം.   അസാധുവാക്കിയ നോട്ടുകളായതിനാല്‍ സി.ആര്‍.പി.സി. വകുപ്പു പ്രകാരം പൊലിസിനു കേസെടുത്ത് അന്വേഷണം നടത്താമെന്നാണു ഡി.ആര്‍.ഐ. വൃത്തങ്ങള്‍ പറയുന്നത്. ഇതേതുടര്‍ന്നാണു ഡി.ആര്‍.ഐ. പിടികൂടിയ പ്രതിയേയും പണവും ടൗണ്‍ പൊലിസിനു കൈമാറാന്‍ തീരുമാനിച്ചത്. വ്യാജ കറന്‍സിയെന്ന രീതിയില്‍ കേസെടുക്കാനാവില്ലെന്നും അതിനാല്‍ അസാധുനോട്ടുകളെ കുറിച്ച് ഡി.ആര്‍.ഐ. തന്നെ അന്വേഷിക്കണമെന്നുമാണു പൊലിസ് പറയുന്നത്.
കോഴിക്കോട് റെയില്‍വേ സ്‌റ്റേഷന് സമീപമുള്ള സ്വകാര്യ പാര്‍ക്കിങ് ഗ്രൗണ്ടില്‍ നിര്‍ത്തിയിട്ട കാറില്‍  നിന്നാണ് കഴിഞ്ഞ ദിവസം ഡി.ആര്‍.ഐ. പണം പിടികൂടിയത്.  നാലുപേരുള്ള സംഘത്തിലെ മൂന്നുപേര്‍ ഓടി രക്ഷപ്പെട്ടു.  തൃശൂര്‍ കരുമാത്ര നെയ്‌വേലി പറമ്പില്‍ എന്‍.ബി.സിറാജ്ജുദ്ദീനെ (39) പിടികൂടുകയും ചെയ്തു.  രക്ഷപ്പെട്ടവരില്‍ പ്രധാനി എറണാകുളം സ്വദേശിയായ കുഞ്ഞിമുഹമ്മദാണ്. തമിഴ്‌നാട് വഴിയാണ് ഈ പണം കോഴിക്കോട്ടെത്തിയത്. വിദേശ ഇന്ത്യക്കാര്‍ക്ക് ജൂണ്‍ 30 വരെ നോട്ട് മാറ്റിയെടുക്കാമെന്ന പഴുത് ഉപയോഗപ്പെടുത്തിയാണ് ഇത്തരം സംഘങ്ങള്‍ പ്രവര്‍ത്തിക്കുന്നത്.