ഇന്ത്യയിലെ ഡിജിറ്റല്‍ പേയ്‌മെന്റ് രംഗത്ത് വഴിത്തിരിവായി വാട്‌സ്ആപ്പിന് ഇന്ത്യയില്‍ യുപിഐ ഇടപാടുകള്‍ ആരംഭിക്കാന്‍ അനുമതി ലഭിച്ചു. നിലവില്‍ യുപിഐയില്‍ രജിസ്റ്റര്‍ ചെയ്യാവുന്ന പരമാവധി ഉപഭോക്താക്കളുടെ എണ്ണം 20 ദശലക്ഷമാണ്. പിന്നീട് ഘട്ടം ഘട്ടമായി വാട്‌സ്ആപ്പിന് യുപിഐ ഉപയോക്തൃ അടിത്തറ വിപുലീകരിക്കാന്‍ കഴിയുമെന്ന് നാഷണല്‍ പേയ്‌മെന്റ് കോര്‍പ്പറേഷന്‍ ഓഫ് ഇന്ത്യ (എന്‍പിസിഐ) പ്രസ്താവനയില്‍ അറിയിച്ചു.

2018ല്‍ വാട്‌സ്ആപ്പിന്റെ പേയ്‌മെന്റ് സംവിധാനം നിലവില്‍ വന്നിരുന്നെങ്കിലും ചില പ്രതിസന്ധികളില്‍ പെട്ട് കിടക്കുകയായിരുന്നു. സുപ്രീം കോടതിയിലും ഇന്ത്യയിലെ കോംപറ്റീഷന്‍ കമ്മീഷനിലും വാട്ട്‌സ്ആപ്പിനെതിരായ പരാതികള്‍ ഫയല്‍ ചെയ്തിട്ടുണ്ട്.

400 ദശലക്ഷത്തിലധികം ഉപയോക്താക്കളുള്ള വാട്‌സ്ആപ്പിന്റെ ഏറ്റവും വലിയ വിപണിയാണ് ഇന്ത്യ. വാട്‌സ്ആപ്പിന് ഉപഭോക്താക്കളുമായി ബന്ധപ്പെടാന്‍ 15 ദശലക്ഷം ചെറുകിട ബിസിനസ്സ് ഉപയോക്താക്കളാണ് ഇന്ത്യയില്‍ ഉള്ളത്.

ഉപഭോക്താക്കളുടെ സ്വകാര്യത, സുരക്ഷ എന്നിവ വലിയ ആശങ്കയായി നിലനില്‍ക്കുന്നുണ്ട്. വാണിജ്യ സംരംഭമായ ജിയോ മാര്‍ട്ടിനായി മുകേഷ് അംബാനിയുടെ റിലയന്‍സ് റീട്ടെയിലുമായി ഫെയ്‌സ്ബുക്ക് അടുത്തിടെ പങ്കാളിയായിരുന്നു. ഇന്ത്യയിലുടനീളം പേയ്‌മെന്റുകള്‍ ആരംഭിക്കാന്‍ വാട്‌സ്ആപ്പിന് അനുമതി ലഭിച്ചതില്‍ സന്തോഷമുണ്ടെന്ന് ഫെയ്‌സ്ബുക്ക് സ്ഥാപകന്‍ മാര്‍ക്ക് സക്കര്‍ബര്‍ഗ് പറഞ്ഞു.

പത്ത് ഇന്ത്യന്‍ പ്രാദേശിക ഭാഷാ പതിപ്പുകളില്‍ വാട്‌സ്ആപ്പിന്റെ പേയ്‌മെന്റുകള്‍ ലഭ്യമാണ്. ഇതിനായി നിങ്ങള്‍ക്ക് വേണ്ടത് യുപിഐ പിന്തുണയ്ക്കുന്ന ഒരു ബാങ്കിന്റെ ഡെബിറ്റ് കാര്‍ഡ് മാത്രമാണ്. വാട്‌സ്ആപ്പിന്റെ ഏറ്റവും പുതിയ പതിപ്പില്‍ പേയ്‌മെന്റ് ഓപ്ഷന്‍ ലഭിക്കുമെന്ന് സക്കര്‍ബര്‍ഗ് പറഞ്ഞു.