കോഴിക്കോട്: 'എനിക്ക് വലിയ ചിത്രകാരനാകണ ം...' ആ കുട്ടി ഹിബയോട് തന്റെ സ്വപ്നം പറഞ്ഞപ്പോള്‍ ഒരിക്കലും കരുതിയിട്ടുണ്ടാവില്ല അത് സാക്ഷാല്‍കരിക്കാന്‍ കഴിയുമെന്ന്.
ഹിബയെന്ന ആര്‍ക്കിടെക്ട് വിദ്യാര്‍ഥിയുടെ നേതൃത്വത്തില്‍ മുപ്പതോളം വളണ്ടിയര്‍മാര്‍ കല്ലുത്താന്‍കടവില്‍ നിന്നുള്ള 25 കൊച്ചുകലാകാരന്മാരെ വാര്‍ത്തെടുക്കാനുള്ള രണ്ടുമാസത്തെ വര്‍ക്ക്‌ഷോപ്പ് ആരംഭിച്ചു. സൗജന്യമായാണ് 'വണ്ടര്‍ കിഡ്‌സ് ആര്‍ട്ട് വര്‍ക്ക്‌ഷോപ്പ്' നടത്തുന്നത്.
കോഴിക്കോടും പുറത്തും വിവിധ സ്ഥാപനങ്ങളില്‍ പഠിക്കുകയും ജോലി ചെയ്യുകയും ചെയ്യുന്ന ചെറുപ്പക്കാരടങ്ങിയ 'പുച്ചിസ്റ്റ് തോട്ട്‌സാണ്'വര്‍ക്ക്‌ഷോപ്പിന് നേതൃത്വം നല്‍കുന്നത്. വിദ്യാര്‍ഥികള്‍ക്ക് വേണ്ട പെയ്ന്റിങ് മെറ്റീരിയലുകള്‍ 'സ്ട്രീറ്റ്‌സ് ഓഫ് കാലിക്കറ്റ്'എന്ന ഇന്‍സ്റ്റഗ്രാം കൂട്ടായ്മയാണ് സ്‌പോണ്‍സര്‍ ചെയ്തത്. ആര്‍ട്ടിസ്റ്റ്, ഹിഡന്‍ ടെയ്ല്‍സ് എന്നീ സംഘടനകളും വര്‍ക്ക്‌ഷോപ്പുമായി സഹകരിക്കുന്നുണ്ട്.
ആനക്കുളം സാംസ്‌കാരിക നിലയത്തില്‍ ചിത്രകാരന്‍ ആഷിഷ് മത്തായി വര്‍ക്ക്‌ഷോപ്പ് ഉദ്ഘാടനം നിര്‍വഹിച്ചു. ഹനീന്‍, ശബ്‌ന സുമയ്യ, ഫൈസല്‍ ഹസൈനാര്‍, മുഹമ്മദ് കന്‍സ്, ഫാബിയാന, ഷാദില്‍, ഫഹീം ബറാമി, മഷൂബ, മുബഷിര്‍ വാഴക്കാട് എന്നിവര്‍ നേതൃത്വം നല്‍കി.