ബംഗളൂരു: ഇന്ന് നടക്കുന്ന എലിമിനേറ്റര്‍ പോരാട്ടത്തില്‍ നിലവിലെ ചാംപ്യന്‍മാരായ സണ്‍റൈസേഴ്‌സ് ഹൈദരാബാദ് മുന്‍ ചാംപ്യന്‍മാരായ കൊല്‍ക്കത്ത നൈറ്റ്‌റൈഡേഴ്‌സിനെ നേരിടും. ലീഗ് പോരാട്ടത്തില്‍ സന്തുലിതാവസ്ഥ പുലര്‍ത്തി മുന്നേറിയ ഹൈദരാബാദ് ബാറ്റിങിലും ബൗളിങിലും ഫീല്‍ഡിങിലും സ്ഥിരത പ്രകടിപ്പിച്ചാണ് മൂന്നാം സ്ഥാനക്കാരായി പ്ലേ ഓഫ് ഘട്ടത്തിലെത്തിയത്.
അതേസമയം ടൂര്‍ണമെന്റിന്റെ തുടക്കത്തില്‍ പ്രകടിപ്പിച്ച ഫോം അവസാന ഘട്ടത്തില്‍ കൈമോശം വന്ന കൊല്‍ക്കത്ത തുടക്കത്തില്‍ സ്വന്തമാക്കിയ വിജയങ്ങളുടെ പിന്‍ബലത്തിലാണ് അവസാന സ്ഥാനക്കാരായി രണ്ടാം ഘട്ടം ഉറപ്പാക്കിയത്. ഇന്ന് വിജയിക്കുന്ന ടീമിന് ക്വാളിഫയര്‍ ഒന്നില്‍ തോറ്റ മുംബൈയുമായി ഒരു മത്സരം കൂടി കളിച്ച് ജയിച്ചാല്‍ മാത്രം ഫൈനലിലെത്താം.