തിരുവനന്തപുരം :  ജില്ലയില്‍ വര്‍ധിച്ചുവരുന്ന ലഹരി വില്‍പന തടയുന്നതിന്  നടപടികള്‍ കൂടുതല്‍ കര്‍ശനമാക്കുമെന്ന് ജില്ലാ കലക്ടര്‍ എസ് വെങ്കടേസപതി. കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന ലഹരിവിരുദ്ധ പ്രവര്‍ത്തനങ്ങള്‍ക്കായുള്ള ജില്ലാതലകമ്മിറ്റിയുടെ അവലോകനയോഗത്തിലാണ് അദ്ദേഹം ഇക്കാര്യം അറിയിച്ചത്.
സ്‌കൂളുകള്‍ തുറക്കുന്ന മുറയ്ക്ക് തന്നെ കുട്ടികള്‍ക്കിടയില്‍ ലഹരിക്കെതിരെ ശക്തമായ ബോധവല്‍കരണപരിപാടികള്‍ നടത്താന്‍ കളക്ടര്‍ നിര്‍ദ്ദേശം നല്‍കി.ഇതിനായി വ്യക്തമായ പദ്ധതി തയ്യാറാക്കും.ലളിതമായ മാര്‍ഗത്തിലൂടെ ബോധവല്‍കരണം നടത്തുന്നതിന് ലഘുനാടകം പോലുള്ള കലാരൂപങ്ങള്‍ വിദ്യാഭ്യാസ സ്ഥാപനങ്ങള്‍ ഉള്‍പ്പെടെ വിവിധ സ്ഥലങ്ങളില്‍ അവതരിപ്പിക്കാമെന്ന് എക്‌സൈസ് ഉദ്യോഗസ്ഥര്‍ അറിയിച്ചു.
കലക്ടര്‍ പങ്കെടുക്കുന്ന ബോധവത്കരണ ക്ലാസുകളും സെമിനാറുകളും സംഘടിപ്പിക്കാനും വീഡിയോ പ്രദര്‍ശനം, വീടുകളില്‍ ലഹരി വിമുക്ത സ്റ്റിക്കറുകള്‍ പതിപ്പിക്കല്‍ തുടങ്ങിയ പ്രവര്‍ത്തനങ്ങള്‍ നടത്താനും യോഗത്തില്‍ തീരുമാനമായി. വിമുക്തി പദ്ധതിയുടെ ഭാഗമായി ജില്ലയില്‍ നടത്തിവരുന്ന പരിശോധനകള്‍ ഊര്‍ജിതമാക്കും.പരിശോധനയുടെ ഫലമായി ഇതിനോടകം നിരവധി ലഹരി പദാര്‍ത്ഥങ്ങള്‍ പിടിച്ചെടുക്കാനും കുറ്റക്കാര്‍ക്കെതിരെ കര്‍ശനനടപടി സ്വീകരിക്കാനും സാധിച്ചതായി അസിസ്റ്റന്റ് എക്‌സൈസ് കമ്മിഷണര്‍ പി .ഉബൈദ് അറിയിച്ചു. യോഗത്തില്‍    ജനപ്രതിനിധികള്‍, രാഷ്ട്രീയ സന്നദ്ധ പരവര്‍ത്തകര്‍ തുടങ്ങിയവര്‍ സംബന്ധിച്ചു.