നിലമ്പൂര്‍: ഒരു ജതയുടെ മുഴുവന്‍ ചിരകാലഭിലാഷമായ നിലമ്പൂര്‍- നഞ്ചന്‍കോട് പാതക്ക് കര്‍ണ്ണാടക എതിരാണെന്ന പ്രചാരണം ശരിയല്ലെന്ന് പിവി അബ്ദുല്‍ വഹാബ് എംപി. നിലമ്പൂരില്‍ മാധ്യമങ്ങളോട് സംസാരിക്കുകയായിരുന്നു അദേഹം.
എന്തെങ്കിലും തടസമുണ്ടെങ്കില്‍ കര്‍ണ്ണാടകയില്‍ കോണ്‍ഗ്രസിന്റെ ചുമതലയുള്ള കെ.സി.വേണുഗോപാലിന്റെ സ്വാധീനം ഉപയോഗിച്ച് പരിഹരിക്കാനാകും. തലശ്ശേരി പാതക്ക് വേണ്ടിയാണ് നിലമ്പൂര്‍ - നഞ്ചന്‍കോട് പാത ഇല്ലാതാക്കാന്‍ ശ്രമിക്കുന്നതെന്ന് സംശയിക്കേണ്ടിയിരിക്കുന്നു. തലശ്ശേരി പാത കണ്ണൂര്‍ക്കാര്‍ക്ക് മാത്രമാണ് ഗുണം ചെയ്യുക.
നിലമ്പൂര്‍-നഞ്ചന്‍കോട് പതാ യാഥാര്‍ഥ്യമായാല്‍ അത് രണ്ട് ജില്ലകളുടെ പൂര്‍ണ വികസനമാണ് നടപ്പാക്കുക. തിരുവനന്തപുരം മുതലുള്ളവര്‍ക്കും പാത ഉപകരിക്കും. വയനാടില്‍ റെയില്‍വെലൈന്‍ എന്ന സ്വപ്നവും പൂവണിയും. പാത അട്ടിമറിക്കാനുള്ള നീക്കം ചെറുത്ത് തോല്‍പ്പിക്കണമെന്നും അദ്ദേഹം പറഞ്ഞു. മുന്‍ സര്‍ക്കാര്‍ നിലമ്പൂര്‍ - നഞ്ചന്‍കോട് പാതയുടെ സര്‍വേക്ക് രണ്ടു കോടി രൂപ നീക്കി വക്കുകയും ഡിഎംആര്‍സിയെ ചുമതലപ്പെടുത്തുകയും ചെയ്തതാണ്. കേന്ദ്ര, സംസ്ഥാന സര്‍ക്കാരുകളുടെ പൊതുസംരംഭം എന്ന നിലക്ക് കമ്പനിയും രൂപവല്‍ക്കരിച്ചു. പാത യാഥാര്‍ത്ഥ്യമാക്കാന്‍ സംസ്ഥാന സര്‍ക്കാര്‍ ഉണര്‍ന്ന് പ്രവര്‍ത്തിക്കണമെന്നും എംപി ആവശ്യപ്പെട്ടു.