കൊച്ചി: പീഡനക്കേസില്‍ ബിഷപ്പ് ഫ്രാങ്കോ മുളയ്ക്കലിന്റെ അറസ്റ്റ് വൈകുന്നത് തെളിവ് നശിപ്പിക്കാനിടയാക്കുമെന്ന് സിസ്റ്റര്‍ അനുപമ. ഹൈക്കോര്‍ട്ട് ജങ്ഷനിലെ വഞ്ചിസ്‌ക്വയറില്‍ നടക്കുന്ന പ്രതിഷേധസമരത്തില്‍ പങ്കെടുക്കവെ മാധ്യമപ്രവര്‍ത്തകരോട് സംസാരിക്കുകയായിരുന്നു അവര്‍. മുന്‍കൂര്‍ ജാമ്യാപേക്ഷയില്‍ പരാതിക്കാരിക്കെതിരേ ബിഷപ്പ് ഉന്നയിച്ചിരിക്കുന്ന ആരോപണങ്ങള്‍ അടിസ്ഥാനരഹിതമാണെന്നും അവര്‍ പറഞ്ഞു. 

സ്ഥാനങ്ങളില്‍നിന്ന് നീക്കിയതിന്റെ വൈരാഗ്യമാണ് പരാതിക്കുപിന്നിലെന്ന ബിഷപ്പിന്റെ ആരോപണവും അവര്‍ തള്ളി. പീഡനശ്രമങ്ങള്‍ എതിര്‍ത്തതിനെ തുടര്‍ന്നുണ്ടായ വൈരാഗ്യംമൂലമാണ് ബിഷപ്പ് പരാതിക്കാരിയെ സ്ഥാനങ്ങളില്‍നിന്ന് നീക്കിയത്.
അറസ്റ്റില്‍ നിന്ന് രക്ഷപ്പെടാനുള്ള വാദങ്ങളാണ് ബിഷപ്പ് ഉന്നയിക്കുന്നത്. ബിഷപ്പിനെതിരേ വ്യക്തമായ തെളിവുകളുണ്ട്. ഈ തെളിവുകള്‍ പൊലിസിന് കൈമാറി. കോടതിയില്‍ വിശ്വാസമുണ്ട്.
സത്യത്തിനൊപ്പമാണ് കോടതി നിലകൊള്ളുന്നത്. ആദ്യം പരാതിക്കാരിക്ക് അനുകൂലമായി മൊഴി നല്‍കിയ ഇടവക വികാരി ഫാ. നിക്കോളസ് മണിപ്പറമ്പിലിന്റെ നിലപാടുമാറ്റം സ്വാധീനം മൂലമാണ്. എല്ലാ തെളിവുകളും നിക്കോളാസ് അച്ചനെ കാണിക്കാനാകില്ല. സഭയെ അപമാനിക്കാനല്ല തങ്ങളുടെ സമരം.
സഭയില്‍നിന്ന് നീതി കിട്ടാത്തതിനാലാണ് തെരുവിലിറങ്ങേണ്ടിവന്നത്. പരാതി നിഷേധിക്കാന്‍ ആവശ്യമായ തെളിവുകള്‍ നല്‍കേണ്ടത് ബിഷപ്പാണ്. ഫാ. ആന്റണി മാടശേരിയാണ് ബിഷപ്പിന് വേണ്ടി സിസ്റ്ററിനെതിരേ വ്യാജ തെളിവുകളുണ്ടാക്കിയതെന്നും അവര്‍ കൂട്ടിച്ചേര്‍ത്തു.
ഫ്രാങ്കോയുടെ മുന്‍കൂര്‍ ജാമ്യാപേക്ഷയുമായി ബന്ധപ്പെട്ട കോടതിയുടെ തീരുമാനം പ്രതീക്ഷ നല്‍കുന്നതാണെന്നും കന്യാസ്ത്രീകള്‍ പറഞ്ഞു.