മാനന്തവാടി: തോല്‍പെട്ടിയില്‍ കാട്ടാനയുടെ ആക്രമണത്തില്‍ വനംവകുപ്പ് വാച്ചര്‍ കൊല്ലപ്പെട്ടു. തോല്‍പെട്ടി വന്യജീവി സങ്കേതത്തിലെ താല്‍കാലിക വനം വാച്ചര്‍ ബാവലി തുറവൂര്‍ കോളനിയിലെ കെഞ്ചനാണ് (46) കൊല്ലപ്പെട്ടത്. ഞായറാഴ്ച രാത്രി എട്ടോടെ ഉള്‍വനത്തിലെ ആന്റി പോച്ചിങ് ക്യാംപിന് സമീപത്തു വച്ചാണ് കെഞ്ചന്‍ കാട്ടാനയുടെ മുന്നിലകപ്പെട്ടത്.
കെഞ്ചനും ഭാര്യ സീതയും മറ്റൊരു വനം വാച്ചറും ആന്റിപോച്ചിങ് ക്യാംപിലേക്ക് നടന്നു പോകുന്നതിനിടയില്‍ കാട്ടാനയുടെ മുന്നിലകപ്പെടുകയായിരുന്നു. മൂവരും ചിതറിയോടിയെങ്കിലും കെഞ്ചനെ ആന ആക്രമിക്കുകയായിരുന്നു. ഗുരുതരമായി പരുക്കേറ്റ കെഞ്ചനെ സംഭവ സ്ഥലത്തെത്തിയ അസി. വൈല്‍ഡ് ലൈഫ് വാര്‍ഡന്‍ പി സുനില്‍ കുമാറിന്റെ നേതൃത്വത്തിലുള്ള വനപാലകസംഘം ഉടനെ മാനന്തവാടി ജില്ലാ ആശുപത്രിയിലെത്തിച്ചെങ്കിലും രക്ഷിക്കാനായില്ല. മക്കള്‍: സരോജിനി, രമേശന്‍, സരസ്വതി.