നോയിഡ: തോക്ക് ചൂണ്ടി സെല്‍ഫി എടുക്കവേ അബദ്ധത്തില്‍ വെടി പൊട്ടി യുവാവ് മരിച്ചു. ഗ്രേറ്റര്‍ നോയിഡ ധ്രംപുര സ്വദേശിയായ 22 വയസുകാരന്‍ സൗരഭ് മാവിയാണ് വെടിയേറ്റ് മരിച്ചത്. നെഞ്ചില്‍ വെടിയേറ്റ് ഗുരുതരമായി പരിക്കേറ്റ യുവാവിനെ ഉടന്‍ തന്നെ സ്വകാര്യ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. കാറില്‍ കൂടെ സഞ്ചരിച്ചിരുന്ന സുഹൃത്തിനെ പൊലീസ് കസ്റ്റഡിയിലെടുത്തു.

സുഹൃത്തും കേസിലെ ദൃക്‌സാക്ഷിയുമായ നകുല്‍ ശര്‍മ്മയാണ് പൊലീസിനെ വിവരം അറിയിച്ചത്. വര്‍ഷങ്ങളായി നകുല്‍ ശര്‍മ്മയും സൗരഭ് മാവിയും സുഹൃത്തുക്കളാണ്. ഇരുവരും സുഹൃത്തായ സച്ചിനെ കാണാന്‍ പോകുന്നതിനിടയിലാണ് സംഭവം. കാറില്‍ പോകുന്നതിനിടെ സൗരഭ് മാവി തോക്ക് എടുത്ത് സെല്‍ഫി എടുക്കാന്‍ ശ്രമിക്കുകയായിരുന്നു. അതിനിടെ അബദ്ധത്തില്‍ വെടിപൊട്ടിയെന്നാണ് നകുല്‍ ശര്‍മ്മ മൊഴി നല്‍കിയതെന്ന് പൊലീസ് പറയുന്നു.

സുഹൃത്ത് നകുലിനെ പൊലീസ് കസ്റ്റഡിയിലെടുത്തതായി സെന്‍ട്രല്‍ നോയിഡ ഡെപ്യൂട്ടി പൊലീസ് കമ്മീഷണര്‍ ഹരീഷ് ചന്ദര്‍ പറഞ്ഞു. പിസ്റ്റളിനെക്കുറിച്ചും അതിന്റെ ഉടമയെക്കുറിച്ചും ഇതുവരെ വിവരം ലഭിച്ചിട്ടില്ലെന്നും അന്വേഷണം നടക്കുകയാണെന്നും അന്വേഷണ ഉദ്യോഗസ്ഥര്‍ അറിയിച്ചു.