അങ്കമാലി: അങ്കമാലി കാലടിഅത്താണി കൊരട്ടി മേഖലയിലെ സ്വകാര്യ ബസ്സ് ജീവനക്കാര്‍ ഒന്നടങ്കം കൂലി വര്‍ദ്ധനവ് ആവശ്യപ്പെട്ട് 25 മുതല്‍ അനിശ്ചിതകാലത്തേക്ക് പണിമുടക്ക് നടത്തും.
2017 മാര്‍ച്ച് 20ന് കരാര്‍ കാലാവധി കഴിയുകയും കരാര്‍ പുതുക്കി നല്‍കുവാന്‍ ബസ്സ് ഉടമ സംഘടനകള്‍ക്ക് നോട്ടീസ് നല്‍കുകയും നോട്ടീസുകള്‍ പ്രകാരം ബസ് ഉടമ സംഘടനകളും യൂനിയനുകളും തമ്മില്‍ പലവട്ടം ചര്‍ച്ചകള്‍ നടത്തുകയും ജില്ലാ ലേബര്‍ ഓഫീസര്‍ രണ്ട് വട്ടം ചര്‍ച്ച ചെയ്തിട്ടും ഉടമാസംഘടനകളുടെ ഭാഗത്തുനിന്നും ഒരു തീരുമാനവും ഉണ്ടാകാത്തതില്‍ പ്രതിഷേധിച്ചാണ് ജീവനക്കാര്‍ പണിമുടക്കുന്നത്.
ഈ മാസം 6ന് മേഖലയിലെ ബസ് ജീവനക്കാര്‍ സൂചനാപണിമുടക്ക് നടത്തിയിരുന്നു. ഇതിന്റെ അടിസ്ഥാനത്തില്‍ 15ന് ജില്ലാ ലേബര്‍ ഓഫീസര്‍ വിളിച്ചുചേര്‍ത്ത ചര്‍ച്ചയിലും കൂലിവര്‍ദ്ധനവ് സംബന്ധിച്ച തീരുമാനം ആകാത്തതുമൂലമാണ് ജീവനക്കാര്‍ അനിശ്ചിതകാല പണിമുടക്കിലേക്ക് നീങ്ങുവാന്‍ തീരുമാനിച്ചത്.
2017 ജനുവരി മുതല്‍ സര്‍ക്കാര്‍ നിശ്ചയിച്ച ഫെയര്‍വേജ്‌സ് പ്രകാരമുള്ള വേതനവര്‍ദ്ധനവ് ഈ മേഖലയില്‍ നടപ്പിലാക്കണമെന്നാണ് ജീവനക്കാരുടെ മുഖ്യ ആവശ്യം. എന്നാല്‍ ബസ്സുടമകള്‍ ഈ ആവശ്യങ്ങള്‍ അംഗീകരിക്കുവാന്‍ തയ്യാറായിട്ടില്ല. ഒരു ബസ്സിലെ മൂന്ന് ജീവനക്കാര്‍ക്കും കൂടി നൂറ് രൂപയുടെ വര്‍ദ്ധനവാണ് ബസ്സുടമാസംഘടനകള്‍ നല്‍കുവാന്‍ തയ്യാറായത്. 22 ന് ജില്ലാ ലേബര്‍ ഓഫീസര്‍ വിളിച്ച ചര്‍ച്ച ശേഷവും ബസ്സുടമ സംഘടനകളുടെ ഭാഗത്തുനിന്നും തീരുമാനം ഉണ്ടായില്ലെങ്കില്‍ 25 മുതല്‍ അനിശ്ചിതകാലം പണിമുടക്കും.