കഴക്കൂട്ടം: ഓണ്‍ലൈന്‍ മാധ്യമ പ്രവര്‍ത്തകനായ ശരത്തിനെ ആക്രമിച്ച് പണം കവര്‍ന്ന കേസിലെ നാല് പ്രതികളെ പൊലിസ് അറസ്റ്റുചെയ്തു. കഴക്കൂട്ടം കിഴക്കുംഭാഗം നേതാജി ലൈനില്‍ വിനീഷ് (30), കിഴക്കുംഭാഗം പെരുമണ്‍ ക്ഷേത്രത്തിന് സമീപം വിനോജ് കുമാര്‍( 40), കഴക്കൂട്ടം തെക്കുംഭാഗം സൗഹാര്‍ദ്ദ നഗറില്‍ ചിക്കു എന്നുവിളിക്കുന്ന നിധിന്‍(29), പങ്ങാപ്പറ കൈരളി നഗറില്‍ ദീപക് ( 30) എന്നിവരാണ് അറസ്റ്റിലായത്.
രണ്ടുദിവസം മുമ്പ് കഴക്കൂട്ടം മഹാദേവക്ഷേത്രത്തിനു പുറകുവശത്തുള്ള റോഡില്‍ വച്ച് ജോലി കഴിഞ്ഞ് ബൈക്കില്‍ വീട്ടിലേക്ക് പോകുകയായിരുന്ന ശരത്തിനെ അക്രമികള്‍ തടഞ്ഞു നിര്‍ത്തി ക്രൂരമായി മര്‍ദിച്ച് പണം പിടിച്ചുപറിക്കുകയായിരുന്നുവെന്ന് പൊലിസ് പറഞ്ഞു.
കഴക്കൂട്ടം ഇന്‍സ്‌പെക്ടര്‍ എസ്.എച്ച്.ഒ എസ്.വൈ സുരേഷിന്റെ നേതൃത്വത്തില്‍ സബ് ഇന്‍സ്‌പെക്ടര്‍മാരായ സുധീഷ് കുമാര്‍, റോയ്, അസി. സബ് ഇന്‍സ്‌പെക്ടര്‍ ജസ്റ്റിന്‍ മോസസ്, സി.പി.ഒമാരായ പ്രസാദ്, അരുണ്‍, അന്‍സില്‍ എന്നിവരടങ്ങുന്ന സംഘമാണ് പ്രതികളെ അറസ്റ്റ് ചെയ്തത്. പ്രതികളെ കോടതിയില്‍ ഹാജരാക്കി റിമാന്‍ഡ് ചെയ്തു.