ഗസ്സ: ഇസ്‌റാഈല്‍ ഉപരോധത്താലും ആക്രമണങ്ങളാലും വലഞ്ഞ ഗസ്സ നിവാസികള്‍ക്ക് ആശ്വസമായി ഖത്തറിന്റെ സാമ്പത്തിക സഹായം. ആയിരക്കണക്കിന് കുടുംബങ്ങള്‍ക്കാണ് 7000 രൂപ വീതം ഖത്തര്‍ കൈമാറിയത്. 60,000 കുടുംബങ്ങള്‍ക്ക് ബുധനാഴ്ച സഹായം വിതരണം ചെയ്‌തെന്നും തപാല്‍ വഴിയാണ് കുടുംബങ്ങള്‍ക്ക് ലഭിക്കുകയെന്നും ഖത്തര്‍ പ്രതിനിധി മുഹമ്മദ് അല്‍ ഇമാദി പറഞ്ഞു.
ഒരു ലക്ഷത്തോളം കുടുംബങ്ങള്‍ക്ക് സഹായം നല്‍കുമെന്നായിരുന്നു നേരത്തേ ഖത്തര്‍ പ്രഖ്യാപിച്ചിരുന്നത്. എന്നാല്‍ നാല് മില്യന്‍ ഡോളര്‍ ഗസ്സക്കാരുടെ സുസ്ഥിരമായ വികസനത്തിനായി മാറ്റിവച്ചെന്നും അദ്ദേഹം പറഞ്ഞു. 25 മില്യന്‍ ഡോളര്‍ ഞായറാഴ്ച നല്‍കാന്‍ തീരുമാനിച്ചിരുന്നെങ്കിലും സാങ്കേതിക കാരണത്താല്‍ വൈകുകയായിരുന്നെന്ന് അദ്ദേഹം പറഞ്ഞു. ഹമാസിന്റെയും ഖത്തറിന്റെയും ഇടയില്‍ നവംബറില്‍ നടന്ന ചര്‍ച്ചയുടെ അടിസ്ഥാനത്തിലാണ് ഗസ്സയിലെ കുടുംബങ്ങള്‍ക്ക് സഹായം നല്‍കാന്‍ തീരുമാനമായത്.