പാരിസ്: ഫ്രാന്‍സില്‍ നടക്കുന്ന വനിതാ ലോകകപ്പ് ഫുട്‌ബോളിന്റെ പ്രീ ക്വാര്‍ട്ടര്‍ മത്സരങ്ങള്‍ക്ക് ഇന്ന് തുടക്കമാകും. ഫുട്‌ബോളിലെ വമ്പന്‍മാരെല്ലാം നേരത്തെ തന്നെ പ്രീക്വാര്‍ട്ടര്‍ ഉറപ്പിച്ചിരുന്നു. ഇന്ന് രാത്രി 9ന് നടക്കുന്ന ആദ്യ പ്രീ ക്വാര്‍ട്ടറില്‍ ജര്‍മനി നൈജീരിയയെ നേരിടും. രാത്രി 12.30ന് നടക്കുന്ന മറ്റൊരു മത്സരത്തില്‍ സ്വീഡന്‍ കാനഡയേയും നേരിടും. ഇറ്റലി-ചൈന, നെതര്‍ലന്‍ഡ്‌സ്-ജപ്പാന്‍ എന്നിവര്‍ തമ്മിലാണ് രണ്ടാം ദിവസത്തെ പ്രീക്വാര്‍ട്ടര്‍ മത്സരം. സാം കെര്‍ നയിക്കുന്ന ആസ്‌ത്രേലിയ നോര്‍വെയേയും ഇംഗ്ലണ്ട് കാമറൂണിനേയും നേരിടും. ആതിഥേയരായ ഫ്രാന്‍സ് ബ്രസീലിനേയാണ് നേരിടുക.

ഇതാണ് പ്രീക്വാര്‍ട്ടറിലെ ക്ലാസിക് പോരാട്ടം. മാര്‍ത്ത നയിക്കുന്ന ബ്രസീലും ആതിഥേയരായ ഫ്രാന്‍സും നേര്‍ക്കുനേര്‍ വരുന്നതോടെ മികച്ചൊരു മത്സരം പ്രതീക്ഷിക്കാം. നിലവിലെ ചാംപ്യന്‍മാരായ അമേരിക്ക സ്‌പെയിനിനെ നേരിടും. ഏഷ്യന്‍ പ്രതിനിധികളായി എത്തിയ ദക്ഷിണ കൊറിയ, ചൈന, തായ്‌ലന്റ് എന്നിവര്‍ക്ക് കാര്യമായി ഒന്നും ചെയ്യാനായില്ല. കൊറിയ, തായ്‌ലന്റ് എന്നിവര്‍ ഒറ്റ മത്സരവും ജയിക്കാതെയാണ് മടങ്ങുന്നത്. മൂന്ന് മത്സരങ്ങളില്‍ നിന്ന് 20 ഗോളുകളാണ് തായ്‌ലന്റ് വഴങ്ങിയത്. മൂന്ന് മത്സരങ്ങളിലും പരാജയപ്പെട്ട കൊറിയ എട്ട് ഗോളും വഴങ്ങി. അതേസമയം, ചൈന ഒരു മത്സരം ജയിക്കുകയും ഒരു മത്സരം സമനിലയിലാക്കുകയും ഒരു മത്സരം തോല്‍ക്കുകയും ചെയ്തു.