ടൊറന്റോ: കാനഡയിലെ ടൊറന്റോയില്‍ ടെസ് ല കാര്‍ ഡിവൈഡറില്‍ ഇടിച്ചുണ്ടായ തീപിടിത്തത്തില്‍ നാല് ഇന്ത്യക്കാര്‍ മരിച്ചു. ഗുജറാത്തിലെ പഞ്ച്മഹല്‍ ജില്ലയിലെ ഗോധ്ര സ്വദേശികളായ രണ്ട് സഹോദരങ്ങളും, ആനന്ദ് ജില്ലയില്‍ നിന്നുള്ള രണ്ടുപേരുമാണ് മരിച്ചത്. വ്യാഴാഴ്ച്ച രാത്രിയോടെയായിരുന്നു അപകടം. ഡിവൈഡറിലിടിച്ച കാറിന്റെ ബാറ്ററിക്ക് തീപിടിച്ചാണ് അപകടമുണ്ടായത്. 

സംഭവത്തില്‍ ഗോധ്ര സ്വദേശികളായ കേതബ ഗോഹില്‍ (29), സഹോദരന്‍ നീല്‍രാജ് (25), ആനന്ദ് ജില്ലയില്‍ നിന്നുള്ള ജയരാജ് സിങ് സിസോദിയ (30), മറ്റൊരു യുവതി എന്നിവരാണ് മരണപ്പെട്ടത്. അപകടത്തില്‍ പരിക്കുകളോടെ രക്ഷപ്പെട്ട യുവതിയെ തിരിച്ചറിയാനായിട്ടില്ല. പിറന്നാള്‍ ആഘോഷം കഴിഞ്ഞ് വീട്ടിലേക്ക് മടങ്ങുന്നതിനിടെയാണ് അപകടം. 

സഹോദരങ്ങളടക്കം നാലുപേരും സംഭവസ്ഥലത്ത് തന്നെ മരിച്ചു. റോഡരികില്‍ നിന്ന ഒരു യാത്രക്കാരന്‍ കൃത്യസമയത്ത് ഓടിയെത്തി കാറില്‍ നിന്ന് പുറത്തെടുത്ത യുവതിയാണ് രക്ഷപ്പെട്ടത്. അപകടത്തില്‍ കാര്‍ പൂര്‍ണ്ണമായും കത്തിനശിച്ചു. 

Four Gujarati natives died after Tesla car crashed into divider in Canada and caught fire