വയനാട് തുരങ്കപാത: കേന്ദ്ര വനം പരിസ്ഥിതി മന്ത്രാലയത്തിന്റെ അനുമതി തേടിയില്ല, വിവരാവകാശ രേഖ പുറത്ത്
കല്പ്പറ്റ: സ്വപ്ന പദ്ധതിയായി സര്ക്കാര് പ്രഖ്യാപിച്ച നിര്ദിഷ്ട വയനാട് മേപ്പാടി കള്ളാടി തുരങ്കപാതയ്ക്ക് കേന്ദ്ര വനം പരിസ്ഥിതി മന്ത്രാലയത്തിന്റെ അനുമതി തേടിയിട്ടില്ലെന്ന് വിവരാവകാശ രേഖ.പദ്ധതിയുമായി ബന്ധപ്പെട്ട് ഒരു അപേക്ഷയും വനംവകുപ്പ് കേന്ദ്രസര്ക്കാരിന് നല്കിയിട്ടില്ല. അസിസ്റ്റന്റ് ഫോറസ്റ്റ് കണ്സര്വേറ്റര് നല്കിയ മറുപടിയിലാണ് ഇക്കാര്യം വ്യക്തമാകുന്നത്.
മേപ്പാടി കളളാടി തുരങ്കപാത സംബന്ധിച്ച് മൂന്ന് ചോദ്യങ്ങളാണ് കോഴിക്കോട് പേരാമ്പ്രാ സ്വദേശി പ്രദീപ് കുമാര് വനംവകുപ്പ് ആസ്ഥാനത്ത് നല്കിയ വിവരാവകാശ അപേക്ഷയില് ഉള്പ്പെടുത്തിയിട്ടുളളത്. തുരങ്കപാതയുടെ അനുമതിക്കായി കേന്ദ്ര വനം പരിസ്ഥിതി മന്ത്രാലയത്തിന് സംസ്ഥാന സര്ക്കാര് അപേക്ഷ നല്കിയിട്ടുണ്ടോ, വനംവകുപ്പില് നിന്ന് അപേക്ഷകള് സമര്പ്പിച്ചുണ്ടോ, ഇത് സംബന്ധിച്ച് സംസ്ഥാന സര്ക്കാരോ കേന്ദ്ര സര്ക്കാരോ എന്തെങ്കിലും കത്തിടപാടുകള് നടത്തിയിട്ടുണ്ടോ എന്ന മൂന്ന് ചോദ്യത്തിനും സര്ക്കാരിന് മറുപടിയില്ല.
650 കോടി രൂപയാണ് തുരങ്കപാതയുടെ നിര്മാണ പ്രവര്ത്തനങ്ങള്ക്കായി നീക്കിവച്ചത്. സര്വ്വേ പ്രവര്ത്തികള് കൊങ്കണ് റെയില് കോര്പ്പറേഷനെ ഏല്പ്പിക്കുകയും ചെയ്തിരുന്നു. എന്നാല് ഇത്ര ബൃഹത്തായ പദ്ധതിയുടെ പ്രാഥമികമായ അനുമതി പോലും നേടാതെ ലോഞ്ചിംഗ് ഉള്പ്പടെ നടത്തിയത് തെരഞ്ഞെടുപ്പു ലക്ഷ്യം വച്ചു മാത്രാമാണെന്നാണ് പ്രതിപക്ഷം ആരോപിക്കുന്നത്.
Comments (0)
Disclaimer: "The website reserves the right to moderate, edit, or remove any comments that violate the guidelines or terms of service."