കോഴിക്കോട്: മൂന്നാഴ്ചയായി ആസിയുമ്മ കോഴിക്കോട് ബീച്ച് ആശുപത്രിയില്‍ തനിച്ചാണ്. ഓര്‍മകള്‍ക്കു മങ്ങലില്ലെങ്കിലും ബന്ധുക്കളെ കുറിച്ച് ഇവര്‍ക്ക് ഒന്നുമറിയില്ല. വടകര സ്വദേശിയാണെന്നാണു പറയുന്നത്.
ബീച്ച് ആശുപത്രിയില്‍ മാതാപിതാക്കളും ബന്ധുക്കളും ഉപേക്ഷിച്ച നിരവധി പേരുണ്ടെന്നറിഞ്ഞ് ജില്ലാ ലീഗല്‍ സര്‍വിസസ് അതോറിറ്റി സെക്രട്ടറിയും സബ് ജഡ്ജിയുമായ എം.പി ജയരാജ് എത്തിയപ്പോഴാണ് ഇവര്‍ കാര്യങ്ങള്‍ പറഞ്ഞത്. 20 സെന്റും ഒരു വീടുമുണ്ട്, പക്ഷേ ആ വീട് താമസിക്കാന്‍ പറ്റില്ല. ബന്ധുക്കളാരുമില്ല. അതുകൊണ്ടുതന്നെ എനിക്ക് അസുഖം ഭേദമായാല്‍ പോകാനിടമില്ലെന്നും ആസിയുമ്മ ജയരാജിനോട് പറഞ്ഞു.
മാസങ്ങളോളം ആസിയുമ്മ റെയില്‍വേ സ്റ്റേഷനിലായിരുന്നു. അവിടുന്ന് പനി ബാധിച്ചതിനെ തുടര്‍ന്നാണ് ബീച്ച് ആശുപത്രിയില്‍ പ്രവേശിപ്പിച്ചത്. ഇപ്പോള്‍ കാലിനും സുഖമില്ല. 'തെരുവിലെ മക്കള്‍ ചാരിറ്റി' എന്ന സംഘടനയാണ് ഇവരെ പരിചരിക്കുന്നത്. കൃത്യമായ സമയങ്ങളില്‍ ഭക്ഷണം എത്തിക്കുന്നതും ഇവര്‍ തന്നെ. ആസിയുമ്മയെ പോലെ ഇരുപതോളം പേര്‍ ബീച്ച് ആശുപത്രിയില്‍ പല വാര്‍ഡുകളിലായുണ്ട്. ബന്ധുക്കള്‍ ഉപേക്ഷിച്ചുപോയവരാണ് എല്ലാവരും.
'തെരുവിലെ മക്കള്‍ ചാരിറ്റി' എന്ന സംഘടനയാണ് ഇവരെ പലരെയും പരിചരിക്കുന്നത്. മക്കളും ബന്ധുക്കളും ഉപേക്ഷിച്ചു പോയാല്‍ അവര്‍ക്കെതിരേ സ്വമേധയാ കേസെടുക്കാന്‍ വകുപ്പുണ്ടെന്നും അവര്‍ ശിക്ഷ അനുവഭിക്കേണ്ടിവരുമെന്നും ലീഗല്‍ സര്‍വിസസ് അതോറിറ്റി സെക്രട്ടറി എം.പി ജയരാജ് പറഞ്ഞു. മെഡിക്കല്‍ കോളജില്‍ നിന്ന് അസുഖം മാറിയ പലരെയും ഇവിടേക്കു മാറ്റുന്നുണ്ട്. എന്നാല്‍ ബന്ധുക്കളെ കണ്ടെത്താനോ അവരിലേക്ക് ഇവരെ ഏല്‍പ്പിക്കാനോ അധികൃതര്‍ ശ്രമിക്കാറില്ല.
ബന്ധുക്കളില്ലാത്തവരെ സംരക്ഷിക്കാന്‍ സര്‍ക്കാരിനു പല സംവിധാനങ്ങളുണ്ടെങ്കിലു ഇവര്‍ക്ക് അതിന്റെ പ്രയോജനങ്ങളൊന്നും ലഭിച്ചിട്ടില്ല. അതിനാല്‍ വാര്‍ധക്യത്തില്‍ ആവശ്യമായ പരിചരണവും സംരക്ഷണവും ലഭിക്കാതെയാണ് ഇവര്‍ ഇവിടെ ജീവിക്കുന്നത്.