കൊച്ചി: കൊച്ചിയില്‍ വിദ്യാര്‍ഥികള്‍ക്കും ലഹരിപാര്‍ട്ടികള്‍ക്കും കഞ്ചാവ് എത്തിച്ചുകൊടുക്കുന്ന സംഘം പൊലിസ് പിടിയിലായി. ഇടുക്കി ജില്ലയിലെ കുമളി, തമിഴ്‌നാട്, കമ്പം എന്നീ സ്ഥലങ്ങളില്‍ നിന്നും ബൈക്കില്‍ കഞ്ചാവ് കടത്തിക്കൊണ്ട് വന്ന നോര്‍ത്ത് പറവൂര്‍ കരുമാലൂര്‍ സ്വദേശി ചില്ലിക്കൂട്ടത്തില്‍ അജീഷ് സുരേഷ് (19), ആലപ്പുഴ തോട്ടപ്പിള്ളി സ്വദേശികളായ ബാബുനന്ദനം കിരണ്‍ബാബു (ലാലു- 18), തണ്ടശ്ശേരി ലിബിന്‍ (20) എന്നിവരെ 400 ഗ്രാം കഞ്ചാവുമായും ചങ്ങനാശേരി സ്വദേശികളായ പടനിലം എബിന്‍ (18), കണ്ടത്തിപ്പറമ്പില്‍ എബിന്‍തോമസ് (18), കോട്ടയം സ്വദേശിയായ കക്കാട്ട് ശരണ്‍ (18) എന്നിവരെ 300 ഗ്രാം കഞ്ചാവുമായും ഷാഡോ പൊലിസിന്റെ നിരീക്ഷണഫലമായി കടവന്ത്ര പൊലിസിന്റെയും എറണാകുളം സൗത്ത് പൊലിസിന്റെയും പിടിയിലായത്.
ജില്ലയിലെ പ്രധാന ലഹരിപാര്‍ട്ടികള്‍ക്കെല്ലാം കഞ്ചാവ് എത്തിച്ചുകൊടുത്തിരുന്ന ഇവരെക്കുറിച്ച് ഡിസ്ട്രിക്ട് ക്രൈംബ്രാഞ്ച് അസിസ്റ്റന്റ് കമ്മിഷണര്‍ എം രമേശ് കുമാറിനു കിട്ടിയ രഹസ്യവിവരത്തിന്റെ അടിസ്ഥാനത്തില്‍ ഷാഡോ സബ് ഇന്‍സ്‌പെക്ടര്‍ ഹണി കെ ദാസിന്റെ നേതൃത്വത്തില്‍ രഹസ്യ നിരീക്ഷണത്തിലായിരുന്നു പിടിയിലായ ഇവര്‍. എറണാകുളം ജില്ലയില്‍ ഏറ്റവും കൂടുതല്‍ കഞ്ചാവ് എത്തുന്നത് കമ്പം, തേനി എന്നീ സ്ഥലങ്ങളില്‍ നിന്നാണെന്നുള്ള രഹസ്യവിവരത്തിന്റെ അടിസ്ഥാനത്തിലാണ് റെയ്ഡ് സംഘടിപ്പിച്ചത്. ബൈക്കില്‍ കഞ്ചാവ് കടത്തികൊണ്ടുവരുന്നവരെക്കുറിച്ച് സൈബര്‍സെല്ലിന്റെ സഹായത്താല്‍ പൊലിസ് നിരീക്ഷിച്ചുവരികയാണ്.
കടവന്ത്ര സബ് ഇന്‍സ്‌പെക്ടര്‍ എം.കെ സജീവിന്റെയും എറണാകുളം ടൗണ്‍ സൗത്ത് സബ് ഇന്‍സ്‌പെക്ടര്‍ സുനുമോന്റേയും നേതൃത്വത്തില്‍ പ്രതികളെ അറസ്റ്റ് ചെയ്തു. ഇവര്‍ക്ക് കഞ്ചാവ് കൊടുക്കുന്നവരെക്കുറിച്ചും കഞ്ചാവ് ഇവരില്‍ നിന്നു വാങ്ങുന്നവരെക്കുറിച്ചും പൊലിസ് അന്വേഷണം ആരംഭിച്ചു. സിവില്‍ പൊലിസ് ഓഫിസര്‍മാരായ ഹരിമോന്‍, സനോജ്, ഷാജി, ഷൈമോന്‍, സുനില്‍, അനില്‍ എന്നിവര്‍ സംഘത്തിലുണ്ടായിരുന്നു.